Алматы халықаралық әуежайында ер адам өзіне қол жұмсамақ болып, жұртшылық назарын аударды, деп хабарлайды turkystan.kz Stan.kz сайтына сілтеме жасап.
Әуежай өкілдерінің айтуынша, оқиға ішкі рейстер терминалында болған. Бір жолаушы әжетханаға кіріп, мойнын әйнек бөтелкенің сынығымен жарақаттамақ болған. Әлеуметтік желіде тараған видеодан қанға толы бөлмені және жерде жатқан әйнек қалдықтарын көруге болады.
"Әуежай қызметкерлері жағдайды дер кезінде байқап, жедел жәрдем шақырды. Дәрігерлер келгенге дейін алғашқы көмек көрсетілді. Қазіргі уақытта ер адамның өміріне қауіп жоқ, ол дәрігерлердің бақылауында", – делінген ресми хабарламада.
Полиция бұл факті бойынша қылмыстық іс қозғаған.
Алдын ала мәліметке сәйкес, оқиғаның кейіпкері Алматы – Астана бағытындағы рейске билет алған. Ол әуежайға ертерек келіп, тіркеуден және тексеруден өткен, бірақ белгісіз себептермен ұшаққа отырмаған. Төрт сағат бойы күту залында болғаннан кейін, жолаушы дәретханаға кіріп, өзін жарақаттауға әрекет жасаған.
Қазіргі таңда оның мұндай қадамға не себепті барғаны анықталуда.
