Алматы облысы Іле ауданына қарасты Көктерек ауылында жаңа фельдшерлік-акушерлік пункт ашылды.
Бұған дейін ауыл жұрты қарапайым тексерулер үшін аудан орталығына баруға мәжбүр болса, енді алғашқы медициналық көмекті өз ауылынан-ақ ала алады.
Нысан ҚР Конституциясының 30 жылдығы қарсаңында пайдалануға беріліп, «AMANAT» партиясының «Халықпен бірге!» сайлауалды бағдарламасы аясында салынды. Құрылысына мемлекетке қайтарылған заңсыз активтерден 263 миллион теңге бөлінген.
Аудан әкімі Қайыржан Жақсымбетовтың айтуынша, жалпы аумағы 70 сотық жерге салынған 264 шаршы метрді құрайтын жаңа ғимарат бір мезетте 40 адамға дейін қабылдауға мүмкіндік береді.
«Бұл фельдшерлік-акушерлік пункт – ауыл тұрғындары үшін қолжетімді әрі сапалы медициналық көмектің кепілі. Ғимарат заманауи жабдықтармен толық қамтылған. Мұнда алғашқы қабылдау, жүкті әйелдерге арналған арнайы кабинет, егу және процедуралық бөлмелер қарастырылған. Ғимаратқа ауыз су құбыры мен кәріз жүйелері тартылған. Алдағы уақытта ауданда осындай тағы екі медициналық пункт ашу жоспарланып отыр», – дейді Қайыржан Жақсымбетов.
«AMANAT» партиясының өкілдері бұл жобаны ауылдағы денсаулық сақтау сапасын арттыруға бағытталған маңызды қадам деп отыр. Өйткені енді тұрғындар дәрігерге қаралу үшін аудан орталығына сабылмайды.
«Анализ тапсыру үшін енді аудан орталығына барудың қажеті жоқ. Тіпті қажет болған жағдайда қаладағы ауруханаларға жолдама беріледі. Бұл – партияның ауылдарда медициналық көмекті жақындату бағытындағы жүйелі жұмыстың нәтижесі», – деді «AMANAT» партиясы Іле аудандық филиалының төрағасы Алмасбек Сатибаев.
Бұл жобаның тағы бір ерекшелігі – оның қаржыландыру көзі. Жаңа медициналық пункттің құрылысына мемлекетке қайтарылған заңсыз активтерден бөлінген қаражат жұмсалды.
Іле ауданының прокуроры Бауыржан Тулендиновтың айтуынша, мұндай бастама – заң үстемдігі мен әлеуметтік әділеттіліктің нақты көрінісі.
«Өңірде заңсыз шығарылған активтерді мемлекетке қайтару бағытында жүйелі жұмыстар жүргізіліп жатыр. Сол қаражат есебінен халыққа қажетті әлеуметтік нысандар салынуда. Бүгін қолданысқа берілген бұл медициналық пункт – соның нақты дәлелі. Қазіргі таңда облыста осындай 22 нысанның құрылысы жүріп жатыр. Көктерек ауылының тұрғындары енді медициналық көмекті өз ауылынан ала алады», – деді ол.
Айта кетейік, биыл Алматы облысында партияның сайлауалды бағдарламасы аясында 15 дәрігерлік амбулатория, 12 фельдшерлік-акушерлік пункт және 11 медициналық пункт салу жоспарланған.
Сонымен қатар, ауылдарға жас мамандарды тарту үшін де нақты шаралар қолға алынған. «AMANAT» партиясының бастамасымен аса тапшы мамандық иелеріне 8,5 миллион теңге көлемінде бір реттік төлем қарастырылған. Шарт бойынша дәрігерлер кемінде бес жыл ауылда қызмет етуге міндетті.
