Палеонтологтар Германиядағы атақты Посидония сланецтерінен бұрын-соңды белгісіз болып келген ежелгі теңіз жыртқышының қалдықтарын тапты. Жаңа түр Plesionectes longicollum деп аталып, шамамен 183 миллион жыл бұрын, ерте юра дәуірінде өмір сүрген. Ғалымдар бұл олжаны плезиозаврлар тұқымдасына жатқызды: ұзын мойынды, жүзуге бейімделген аяқтары бар су жануарлары. Зерттеу нәтижелері Fossil Record журналында жарияланды, деп хабарлайды turkystan.kz.
Бастапқыда бұл қаңқа 1978 жылы Хольцмаден маңындағы карьерден табылғанымен, ондаған жылдар бойы музей қоймаларында назардан тыс жатқан. Тек жаңа 3D визуализация әдістері мен анатомиялық талдаудың арқасында оның танымал түрдің жас дарасы емес, мүлде жаңа бір жануар екенін анықтауға мүмкіндік туды. Осылайша, Plesionectes longicollum аталған аймақта табылған ең ежелгі плезиозаврға айналды.
Табылған қаңқаның толыққа жуық сақталуы сирек кездесетін жағдай саналады. Тіпті кейбір жұмсақ тіндердің қазындысы да табылған. Рептилия ерекше ұзын мойыны және иық белдеуінің өзгеше құрылымы арқылы ерекшеленеді. Бұл оның суда қозғалу тәсілдері мен өмір салты туралы маңызды ақпарат береді.
Plesionectes longicollum Жер тарихындағы климаттық және экологиялық күрт өзгерістер кезеңінде өмір сүрген. Бұл уақыт мұхиттағы оттегі мөлшері күрт азайған «аноксиялық оқиғамен» байланысты. Жаңа ашылым ежелгі теңіз жануарларының осындай экстремалды жағдайларға қалай бейімделгенін жақсырақ түсінуге көмектеседі.
