Жапониядан бастау алған ерекше жаяу жүру әдісі бүгінде әлемдік денсаулық сақтау саласының назарына іліккен тың жаңалық. Ғалымдар тиімді әрі қолжетімді деп бағалаған бұл тәсіл – «жапонша жүру» (немесе интервалды жүріс) – қазір TikTok желісінде кеңінен танылып, #FitTok хэштегімен таралып жатыр. Ал оның артында деректі зерттеулер мен нақты нәтижелер жатыр, - деп хабарлайды turkystan.kz euronews.com-ға сілтеме жасап.
Жапон ғалымдары Хироши Носе мен Сидзуэ Масуки алғаш рет 2007 жылы бұл әдісті ұсынған. Олар 246 егде жастағы адамды үш топқа бөліп, бір бөлігіне мүлдем жүрмеуді, екіншісіне жай жүрісті, ал үшіншісіне үш минут жылдам, үш минут баяу жүрісті ауыстырып отыруды тапсырған. Бұл жаттығу аптасына 4–5 рет, күніне 30 минут орындалған.
Нәтижесінде интервалды тәсілмен жүрген адамдарда аяқ бұлшықеттерінің күші артқан, қан қысымы төмендеген, жалпы физикалық дайындық жақсарған. Жаңа зерттеулер мұнымен шектелмейді: 700-ден астам адам қатысқан кейінгі зерттеу интервальды жүру когнитивті қабілетке, ұйқы сапасына, күйзеліс деңгейіне оң әсер ететінін көрсеткен.
Ғылым не дейді?
Ұлыбританиядағы Кил университетінің физиология профессоры Джон Бакли бұл тәсілді «организмге шамалы күшпен қысым түсіру арқылы бейімдеу» деп сипаттайды. Бұл – спорт ғылымында кеңінен танылған «жүктеме принципі».
– Адамның денсаулығы тек жүрек пен өкпенің жұмысына емес, бұлшықеттегі метаболизмге де тығыз байланысты. Қысқа уақыттық күш түсіру арқылы біз осы мүшелердің жұмысын жақсартамыз, – дейді ол.
Жалпы, адамның эволюциялық дамуына тән қозғалыс – қысқа қарқынмен жүгіріп, кейін ұзақ уақыт баяу қозғалу. Яғни бұл әдіс табиғи қозғалыс үлгісіне жақын.
Денсаулыққа нақты қандай пайдасы бар?
Жапонша жүру жүрек ауруы, қант диабеті, семіздік сияқты заманауи проблемалармен күресуге көмектеседі. Бұл жаттығу қандағы қант деңгейін төмендетіп, артериялық қысымды реттейді, сондай-ақ жаттығудан кейінгі калория шығынын арттырады. Әсіресе инсульттің алдын алуда артериялық қысымды бақылауда ұстау маңызды.
Бұл тәсіл психикалық денсаулыққа да оң ықпал етеді. Жоғары қарқынды сәттерде адамның назары сол сәтке ауысады, бұл «мини-медитация» әсерін береді. Жақында жарияланған шолуда жоғары қарқынды интервальды жаттығулар (HIIT) мазасыздық деңгейін төмендететіні дәлелденген.
Жапонша жүру – кез келген адамға қолжетімді. Күрделі жабдық қажет емес, кез келген жерде жасауға болады. Сонымен қатар, бұл әдісті велоспортқа, жүзуге немесе күштік жаттығуларға да бейімдеуге болады.
Қорытынды: TikTok-тағы трендтің бұл жолы шынайы ғылыми негізі бар. Егер денсаулығыңызды нығайтқыңыз келсе, жапон әдісімен 30 минут серуендеуді бүгіннен бастап кетуіңізге болады.
