Қостанайда синтетикалық есірткі заттарын сақтады және таратты деген күдікпен 19 жастағы жігіт ұсталды, деп хабарлады turkystan.kz.
Жас жігіт 2025 жылдың сәуір айынан бастап есірткі таратушы ретінде жұмыс істеп, синтетикалық есірткі сату бағытында жұмыс істейтін интернет-дүкенмен байланыста болған.
Күдікті бұған дейін есірткі жасырған орындарды тексеру барысында қызыл изолентаға оралған төрт түйіншек табылды. Ішінен ерекше иісі бар ақ түсті зат шықты, алдын ала болжам бойынша — синтетикалық есірткі.
Күдіктінің пәтерін тінту кезінде қосымша айғақтар табылды. Полицейлер телефон қорабынан жасыл түсті, өсімдік тектес құрғақ затты анықтады. Алдын ала мәлімет бойынша, бұл — кептірілген марихуана. Сондай-ақ қаладағы 8-шағынауданда орналасқан гараждан есірткіні буып-түю мен тұтынуға арналған құралдар табылып, тәркіленді.
Тергеу кезінде күдікті өз кінәсін мойындап, есірткіні таратып жүргенін болғанын растады. Ол есірткінің партияларын алып, оларды алдын ала белгіленген орындарға жасырып, координаттарды мессенджер арқылы сатып алушыларға жіберіп отырған.
Күдіктіге қатысты келуге міндеттеу түріндегі процесстік мәжбүрлеу шарасы таңдалды. Қазіргі уақытта істің барлық мән-жайын және ықтимал сыбайластарды анықтауға бағытталған тергеу және жедел іс-шаралар жалғасуда.
Полиция есірткінің заңсыз айналымына, соның ішінде интернет арқылы таратылуына қатаң қылмыстық жауапкершілік қарастырылғанын ескертеді. Құқық қорғау органдары азаматтарды мұндай фактілер туралы дереу хабарлауға және сақ болуға шақырады.
