Көпшілігіміз терезені ашып, таза ауа мен табиғат сыбдырынан ләззат алып ұйықтағанды ұнатамыз. Бұл қарапайым әдеттің денсаулыққа оң немесе теріс әсері болуы мүмкін, ол сыртқы факторларға – температура, ылғалдылық және шудың деңгейіне байланысты.
Ұйқы жағдайларын өзгертпес бұрын, әсіресе созылмалы ауруларыңыз болса, міндетті түрде дәрігермен кеңесіңіз!
Ашық тереземен ұйықтаудың басты артықшылықтарының бірі – желдету. Терезенің ашық болуы бөлмедегі ауа айналымына ықпал етіп, көмірқышқыл газының деңгейін төмендетеді және сергек атмосфераны қамтамасыз етеді. 2017 жылы жүргізілген зерттеуде ашық тереземен ұйықтаған қатысушылар ұйқы сапасының жақсарғанын атап өткен.
Зерттеу авторы, доктор Асит Мишраның айтуынша, бөлмеде желдету жеткіліксіз болған жағдайда біз әртүрлі ластаушы заттардың әсеріне ұшыраймыз, бұл ұйқы сапасына кері әсер етеді.
Ашық терезе бөлмеде жайлы температураны сақтауға көмектеседі, бұл жақсы ұйқыға септігін тигізеді. Салқын ауа ұйқы сапасын жақсартатынын атап өткен жөн, бірақ температура тым төмендеп кетсе, бұл жайсыздық тудыруы мүмкін. Мұндай жағдайда көрпе немесе қосымша жылы киім қолдану арқылы тоңудан сақтану керек.
Ашық тереземен ұйықтаудың кемшіліктері
Дегенмен терезені ашу әрқашан орынды бола бермейді. Қалалық жерде көше шуы ұйықтауға кедергі келтіруі мүмкін. Көлік, адамдардың сөйлесуі немесе басқа дыбыстар тыныштықты бұзып, демалуға мүмкіндік бермейді. Ауылдық жерде бұл мәселе ерте таңертең сайрайтын құстар сияқты жануарлардың дыбыстарымен байланысты болуы мүмкін.
Егер далада жаңбыр немесе қатты жел болса, терезені жапқан дұрыс. Өйткені мұндай жағдайда салқындап қалу немесе температураның күрт өзгеруінен жайсыздық сезіну қаупі артады.
Созылмалы тыныс алу жолдары аурулары бар адамдар үшін (мысалы, астма немесе аллергиялық ринит) ашық терезе тітіркендіргіштердің көзіне айналуы мүмкін.
