Алматы облысында "алып қашу" дәстүрі қайғылы жол-көлік оқиғасымен аяқталды, деп хабарлайды turkystan.kz.
Қалыңдық Батыс Алматы айналма жолының (БАКАД) 36-шақырымында екі автокөліктің соқтығысуы салдарынан оқиға орнында қаза тапты. Жігіт пен оның екі танысы да жарақат алды, оқиғаға кінәлі жүргізуші қамауға алынды.
Kia және Mercedes-Benz көліктері соқтығысқан. Қатты соққыдан Mercedes аударылып кеткен. Қалыңдық Mercedes көлігінің салонында отырған.
Ауыр салдарға әкеп соққан жол-көлік оқиғасы бойынша құқық қорғау органдары қылмыстық іс қозғады. Соқтығысқа себепкер болған Kia автокөлігінің жүргізушісі ұсталып, уақытша ұстау изоляторына қамалды. Қазіргі уақытта қайғылы жағдайдың барлық мән-жайын анықтау үшін тергеу жүргізілуде.
