29 наурызда Шымкентте үндістандық студент жаттығудан кейін жүрек талмасынан көз жұмды, деп хабарлады turkystan.kz.
Үндістандық India Today басылымының жазуынша, көз жұмған студенттің есімі Уткарш Шарма, жасы 21-де болған. Ол Раджастхан штатынан Шымкентке келіп, Оңтүстік Қазақстан медицина академиясында медицина мамандығы бойынша білім алып жүрген..
Денсаулық сақтау министрлігі Оңтүстік Қазақстан медицина академиясының 2003 жылы туған студенті 30 наурызға қараған түні көз жұмғаны туралы айтты.
«Түнде науқастың жағдайы күрт нашарлаған. Жанында болған студенттер мен көршілері жедел жәрдем шақырған. Алайда, дәрігерлер келген кезде оның қайтыс болғанын анықтады. Оған кардиомиопатия диагнозы қойылды. Марқұмның ата-анасы Қазақстанға келді, ал университет мәйітті бальзамдау және Үндістанға жеткізу шығындарын өз мойнына алды. Ата-анасына көңіл айтылды, олардың ешқандай шағымы жоқ», – делінген министрлік хабарламасында.
Шымкент қалалық полиция департаменті студенттің өліміне байланысты қылмыстық іс қозғады. Марқұмның зорлық-зомбылық белгілері анықталмаған. Қазіргі уақытта сот-медициналық сараптама тағайындалды.
