Депутат осының салдарынан трансшекаралық өзен Сырдарияға жетпей, елді мекендер сусыз қалып отырғанын айтты.
Мәжіліс депутаты Мақсат Толықбай Шу өзенінің арнасы заңсыз бұрылып, салдарынан Созақ даласы сорға айналып бара жатқанын мәлімдеді. Оның айтуынша, Мойынқұм ауданындағы бір кәсіпкер Шу өзенінің ағысын бөгеп, өз фазендасына бұрып алған.
Депутат осының салдарынан трансшекаралық өзен Сырдарияға жетпей, елді мекендер сусыз қалып отырғанын айтты.
«Тұрғындардың айтуынша, тас пен топырақтан бөгет салынып, өзеннің ағысы тоқтатылған. 12 мың ірі қарасы бар бизнесменге сот жоқ. Дронмен түсірілген фото-видеоларын қолыма ұстатты. Өзен бірнеше жерден заңсыз бөгелген», – деді депутат.
Мақсат Толықбай бұл мәселенің жоғары деңгейде көтерілгенін де еске салды. Маусым айында Премьер-министр Жамбыл облысына барған кезде жағдайдың қаншалықты рас екенін сұраған. Алайда, жергілікті шенеуніктер мен салалық министрлік «бұл – жалған ақпарат» деп Бектеновке есеп берген.
«Су ресурстары министрі бұл фазенданы неге қорғаштап отыр? Жағдайды білмей ме, әлде кәсіпкерге сөзі өтпей ме? Немесе бұл шаруашылық министр Нұржан Нұржігітовтің өзіне тиесілі ме?» – деп сұрақ қойды депутат.
Оның айтуынша, мәселе ушығып барады. Егер бұл жағдай тез арада шешілмесе, Созақ ауданындағы сегіз ауылдың тұрғындары Астанаға келіп, өз наразылығын білдіруге дайын отыр. Депутаттың сөзінше, қазірдің өзінде 80 мыңнан астам тұрғын экологиялық апаттың алдында тұр.
«Созақ халқы онсыз да уран өндірісінен зардап шегіп отыр. Енді міне, судың жоқтығынан даласы айтақырға айналып, малмен күнелткен халық шабындық шөптің өзін Қызылордадан сатып алуға мәжбүр», – деді ол.
Бұрын Сырдарияға дейін жететін Шу өзенінің бойы қалың қамыс пен жайылымға толы болған. Ал қазір су бөлініп, лайланып, сасып жатқан балдырға айналған.
Мақсат Толықбай Су ресурстары министрлігінен мынадай нақты шараларды қолға алуды талап етті:
- Су реттегіш құралдар мен заңсыз салынған бөгеттерді бұзып, өзеннің табиғи арнасын қалпына келтіру
- Гидротехникалық құрылыс-жайлардың толық есебін жүргізу
- Министрлік фазенда туралы видео-фотоларға ресми түсініктеме беруі тиіс
- Өзенді бақылау мен мониторингті күшейтіп, механикалық тазалау жұмыстарын бастау
«Алатаудан аққан су аяғына дейін жетуі керек! Бұл мәселеге тиісті органдар немқұрайлы қарамай, дереу шешім қабылдауға тиіс», – деді депутат.
