Контенттер біздің әлсіздігімізден пайда көретін ірі корпорациялар тарапынан жасалған. Бұл әдейі ойластырылған жүйе, – дейді ғалым.
Смартфонды бір жаққа ысырып қою іске зейін қойып, өнімділікті арттыруға жеткіліксіз. Мәселе гаджетте емес, оны қолдану әдеттерімізде жатыр. Лондон экономика мектебінің зерттеушісі Макси Хайтмайердің (Dr. Maxi Heitmayer) айтуынша, адамдар бос уақыт пайда болған сайын телефондарын тексереді.
Frontiers in Computer Science журналында жарияланған зерттеуде смартфонды қол жетпейтін жерге қою жұмыс процесіне қалай әсер ететіні зерттелген. Нәтижесінде, қатысушылар телефондарын жасырып қойса да, кейін жұмыс компьютеріне TikTok жүктеп, назарын басқаға аударған.
Зерттеу телефонды алып тастаудың алаңдаушылық пен прокрастинацияны азайтуға немесе өнімділікті арттыруға жеткіліксіз екенін көрсетеді. Мәселе құрылғының өзінде емес, оны пайдалану дағдыларымызда, – дейді Хайтмайер.
Ол адамдар уақыттарын тиімді пайдалану үшін хабарландыруларды белгілі бір уақытқа жоспарлау немесе мүлде сөндіру қажет екенін ұсынды. Бірақ соған қарамастан, телефондарымыздан бас тарту оңай болмайтынын атап өтті.
Адамдар қолы қалт еткен сайын телефондарын тексереді, ал әлеуметтік желілер – мүлде басқа деңгейдегі мәселе, – дейді зерттеуші. Біз күн сайын күресеміз. Ең қатты назар аудартатын контенттер біздің әлсіздігімізден пайда көретін ірі корпорациялар тарапынан жасалған. Бұл әдейі ойластырылған жүйе, – деп толықтырды ол.
Хайтмайер болашақта пайдаланушыларды, әсіресе жастарды қорғауға көбірек назар аудару қажет екенін айтты.
Бұл құрылғылар өте пайдалы және білім алу мен шығармашылықты дамытуға көмектеседі. Бірақ олардың ересектердің өздері де күресіп жүрген ауыр салдары бар. Сондықтан бұл мәселені елемеуге болмайды, – деді зерттеуші.
