Ақтаулық шенеуніктер киіз үйді 7 миллион теңгеге сатып алуды жоспарлаған. Барлығы 12 киіз үй сатып алуды жоспарлаған. Алайда прокурорлар оларға бұл әрекетке жол бермеді, деп хабарлады "Астана" телеарнасы.
Қадағалау органы әлеуметтік желілерде киіз үй сатып алуға бөлінген сомаға байланысты туындаған шуға қатысты жауап берді. 12 киіз үй үшін әкімдік қызметкерлері 81 млн теңге төлеуді жоспарлаған. Қадағалау органының қызметкерлері сараптама жүргізіп, мұндай тауарларды 1,5-2 миллион теңгеге сатып алуға болатынын анықтады.
"Әкімдік қызметкерлеріне біздің өтінішімізді қарауға бір ай уақыт бар, содан кейін олар осы соманы белгілегендерге қандай шара қолданғаны туралы жазбаша жауап беруі қажет. Іс-әрекеттерді тәртіптік комиссия қарайды. Яғни, кінәлілерге қандай жаза тағайындалатынын қала басшылығы шешеді", - деді Ақтау қалалық прокуратурасының қоғамдық мүддені қорғау жөніндегі прокуроры Альберт Есмурзаев.
