Қарағанды облысында 15 жастағы қызға қатысты қылмыс жасады деген күдікпен 38 жастағы ер адам ұсталды. Бұл туралы 16 наурызда өңірдің Полиция департаментінің баспасөз қызметі хабарлады, деп жазады turkystan.kz zakon.kz-ке сілтеме жасап.
Ведомство мәліметінше, полицияға арыз 15 наурызда түскен. Сол күні қылмыстық іс қозғалып, күдікті ұсталып, уақытша ұстау изоляторына қамалды.
“Қазіргі уақытта тергеу аясында болған оқиғаның барлық мән-жайын анықтауға бағытталған қажетті сот сараптамалары жүргізілуде”, – деп атап өтті департамент өкілдері.
Бұл оқиғаға ҚР Оқу-ағарту министрлігінің Балалар құқықтарын қорғау комитеті де пікір білдірді.
“Қыз бала туған әкесімен бірге, оған барлық қажетті психологиялық көмек көрсетіліп, заңгерлік қолдау да беріледі. Балалар құқықтары жөніндегі өңірлік уәкіл әкесімен тұрақты байланыста болып, сондай-ақ өгей әкесі мен анасын қылмыстық жауапкершілікке тарту туралы талап қойды. Балалардың құқықтарын қорғау комитеті жағдайды қатаң бақылауда ұстап, баланың құқықтарын қорғау үшін барлық қажетті шараларды қабылдауда”, – делінген хабарламада.
