Қоғамда бала күтімі бойынша берілетін ай сайынғы жәрдемақыны 3 жасқа дейін ұзарту мәселесі қызу талқыланып жүр. Осы тақырып аясында BAQ.KZ тілшісі Еңбек және халықты әлеуметтік қорғау министрлігінен жауап алды.
Бүгінгі таңда Қазақстанда бала туған кезде ата-аналарға бір реттік төлем беріледі. Одан бөлек, бала 1,5 жасқа толғанға дейін ай сайынғы жәрдемақы төленеді. Бұл төлемнің мөлшері отбасындағы балалардың санына қарай сараланады:
Бірінші балаға – 5,76 АЕК
Екінші балаға – 6,81 АЕК
Үшінші балаға – 7,85 АЕК
Төртінші және одан кейінгі балаларға – 8,90 АЕК
Ескерту: Айлық есептік көрсеткіш (АЕК) жыл сайын өзгеретіндіктен, жәрдемақы сомасы да тиісті индекстеуден өтеді.
Жәрдемақыны 3 жасқа дейін ұзарту мүмкін бе?
2022 жылғы 1 қыркүйекте Қазақстан Президенті Қасым-Жомарт Тоқаевтың "Әділетті ел. Біртұтас ұлт. Берекелі қоғам" атты халыққа Жолдауында бала күтімі бойынша төлем мерзімін 1 жастан 1,5 жасқа дейін ұзарту тапсырылды. Бұл өзгеріс 2023 жылдың 1 қаңтарынан бастап күшіне енді.
Ал жәрдемақыны 3 жасқа дейін төлеу мәселесі әлі күнге ашық күйінде қалып отыр.
Жоғарыда аталғанның негізінде, балалы отбасыларды қолдау жүйесін одан әрі дамыту елдің әлеуметтік-экономикалық және мемлекеттік бюджеттің нақты мүмкіндіктерін ескере отырып, кезең-кезеңімен жүзеге асырылатын болады, - делінген жауапта.
