Семейде жасөспірімдер алтыншы сынып оқушысын соққыға жықты
Іске қатысы бар барлық бала тез арада анықталып, ата-аналарымен бірге полиция бөлімшесіне жеткізілді
Семей қаласында алтыншы сынып оқушысын соққыға жыққан жасөспірімдерге қатысты қылмыстық іс қозғалды.
Әлеуметтік желіде Семейде бір топ жеткіншек өз қатарласын соққыға жығып жатқан видео тарап кетті. Абай облысы полиция департаментінің мәліметіне сүйенсек, қазір аталған факті бойынша қылмыстық іс қозғалған.
— Іске қатысы бар барлық бала тез арада анықталып, ата-аналарымен бірге полиция бөлімшесіне жеткізілді. Жеткіншектер полиция бөлімінде есепке алынады. Олардың мінез-құлқын облыстық кәмелетке толмағандардың құқығын қорғау комиссиясы қарайтын болады. Балаларын тәрбиелеуде өз міндеттерін дұрыс орындамағаны үшін ата-аналар қатаң жауапқа тартылады, — делінген ақпаратта.
Оқиғаның себептеріне үңілу үшін оқу орнының әкімшілігіне ұсыныс жасалмақ.
Тергеу барысы Абай облыстық полиция департаменті басшылығының ерекше бақылауында.
