Астанада есірткі таратушыдан аса ірі көлемде гашиш майы тәркіленді
Аталған факті бойынша қылмыстық іс қозғалып, күдікті уақытша ұстау изоляторына қамалды

Криминалдық полиция басқармасының қызметкерлері кезекті есірткі таратушының заңсыз әрекетін тоқтатты.
Polisia.kz мәліметінше, жедел-іздестіру шаралары барысында қала аумағында есірткі таратумен айналысқан 36 жастағы азамат ұсталды. Жеке тексеру кезінде ер адамның күртесінің қалтасынан 300 мың теңгеге жуық ақша табылды. Кейін үйінде, асүйдегі шкафтан 937 мл көлеміндегі сұйық ашық-қоңыр түсті зат құйылған пластикалық бөтелке, 400 майды құюға арналған пластикалық ампула және ішіне сұр-жасыл түсті зат салынған қағаз түйіншек табылып, тәркіленді.
Күдікті көрсеткен жерді тексеру барысында, құқық қорғау органдары екі түйіншек тапты, олардың әрқайсысында есірткі заты бар төрт ампуладан болған.
Тергеу барысында ер адамға Telegram арқылы есірткі тасымалдаушы ретінде жұмыс істеу ұсынылғаны анықталды. Аталған факті бойынша қылмыстық іс қозғалып, күдікті уақытша ұстау изоляторына қамалды.