Түркістан облысында екі қолы жоқ өнерпаз аяғымен сурет салып, садақ атады
Ол аяғымен садақ атып, «Ең үздік садақшы» номинациясын жеңіп алған
Түркістан облысы Бәйдібек ауданының тумасы Нышанғали Рахман екі аяғының көмегімен сурет салып, жазу жазады. 19 жастағы жігіт бүгінде Кентау қаласындағы арнаулы колледждің екінші курсында оқиды, деп хабарлады turkystan.kz el.kz-ке сілтеме жасап.
Өңірлік коммуникациялар қызметінің мәліметінше, жас суретші өзі сияқты тағдырлас жандармен бірге оператор мамандығын меңгеріп жүр. Көпбалалы отбасында тәрбиеленген Нышанғали Рахманға екі қолының жоқтығы кедергі емес, барлық істі аяғымен жасап үйренген. Ол ұялы телефонды да аяқ башпайларымен пайдаланады. Тіпті ойын ойнап, компьютердің құрылғыларын ауыстырып, сурет те салады.
Негізінен анимация және мультфильм кейіпкерлерінің суреттерін салғанды жақсы көремін. Шаршаған кезімде ән тыңдап, өзім ұнатқан суретті салып, жаным демалып қалады. Сонымен қатар ән айтып, жарыстарға да қатысамын. Болашақта архитектор болуды армандаймын. Сәулет өнерінің қыр-сырын меңгеріп, келісті үйлердің сызбасын жасау жоспарымда бар, - дейді Нышанғали Рахман.
Ұстаздарының айтуынша, ол қоғамдық жұмыстарға да белсенді. Колледжде жүріп садақ ату, жүзу, теннис, шахмат, тоғызқұмалақ ойнаудан үздіктердің қатарында. Тіпті аяғымен садақ атып, «Ең үздік садақшы» номинациясын жеңіп алған.
