Желіде Ақтөбедегі гимназиядағы есігі жоқ қыздар дәретханасының суреті пайда болды. Бұған қатысты мектеп әкімшілігі түсінік берді, деп хабарлайды Halyq Uni.
Жазба алдымен Instagram-дағы Aqtobe_sergek парақшасына жарияланған. Фотосуретте арасы бөлінген, бірақ есіктері жоқ екі дәретхана тұр.
Мектеп-гимназияға жаңа ғимарат қосылды. Бұл балалардың заманауи ғимаратта оқитыны өте қуантады, бірақ мектеп әкімшілігінің байқамай отырған мәселесі – дәретхана. Атап айтқанда, қыздарға арналған есігі жоқ дәретхана. Неліктен қыздарға мұндай қарым-қатынас жасалды? Олардың қажеттілігіне неліктен құрметсіздік көрсетілген? Мұндайды қалай жобалап, қолданысқа беруге болады? - делінген жазбада.
Жазбаға пікір жазғандар қатарында мектеп әкімшілігінің өкілдері де бар. Олар жағдайға қатысты түсінік берді.
№2 мектеп-гимназиясының әкімшілігі мектептің қосымша ғимараты жақында ғана пайдалануға берілгенін хабарлады. Алдағы уақытта аталған мәселе шешілетін болады, - делінген онда.
Сонымен қатар қадағалаушы ведомство да пікір білдірген. Олар өтініш Ақтөбе облысының ахуалдық орталығында тіркеліп, құзыретті ұйымның қарауына жіберілгенін мәлім етті.
Ал HALYQSTAN Telegram-арнасының мәліметінше, құрылыс жұмыстарына 815 миллион теңге жұмсалған. Қосымша ғимараттың құрылысы былтыр басталып, ғимарат биыл пайдалануға берілген.
