233
Алматыда автобус пен тепловоз соқтығысып, 6 адам зардап шекті (ВИДЕО)
Жол-көлік оқиғасы сағат 11:40–та Алмалы ауданында болған.
Алматыда қоғамдық көлік пен тепловоз соқтығысты. Оқиға салдарынан 6 жолаушы жарақат алды.
Алматы қаласы Полиция департаментінің мәліметіне сәйкес, жол-көлік оқиғасы сағат 11:40–та Алмалы ауданында болған.
Жеке тасымалдаушыға тиесілі № 88 автобус Әуезов көшесімен солтүстік бағытта келе жатып, Гоголь көшесінің солтүстігінде батысқа қарай темір жолмен келе жатқан тепловозбен соқтығысты. Жол апаты салдарынан қоғамдық көліктің 6 жолаушысы зардап шекті. Оларға медициналық көмек көрсетілді, — деп хабарлады қалалық ПД баспасөз қызметі.
Оқиғаның басқа мән-жайлары анықталып жатыр.
