Биыл 229 мектепке дейінгі ұйым реновациядан өтеді
Бүгінде елімізде 11 346 мектепке дейінгі тәрбие беру мен оқыту ұйымы бар.
![Биыл 229 мектепке дейінгі ұйым реновациядан өтеді](https://turkystan.kz/cache/imagine/1200/uploads/resized-images/2024/05/1716888050.jpg)
229 мектепке дейінгі ұйым 2024 жылы реновациядан өтеді, деп хабарлады turkystan.kz.
Оқу-ағарту министрлігінің мәліметінше, бүгінде елімізде 11 346 мектепке дейінгі тәрбие беру мен оқыту ұйымы бар. Биылғы жылы 229 мемлекеттік балабақшаны реновациядан өткізу жоспарлануда.
Мектепке дейінгі ұйымдардың реновациясы балаларды тәрбиелеу мен оқыту жағдайын жақсартуға бағытталған. Өткен жылы 198 нысанға күрделі жөндеу жүргізіліп, компьютерлік техникасы жаңартылып, модернизациядан өткен болатын.
«Біз балаларымыздың оқуы мен дамуы үшін жақсы жағдай жасауға тырысамыз. Мектепке дейінгі ұйымдардың реновациясы – бұл әр баланың болашағын жарқын, табысты етуге салынған инвестиция», - дейді мектепке дейінгі білім беру департаментінің директоры Манар Адамова.
Бұдан басқа, елімізде жаңадан балабақшалар ашылып, желісі кеңеюде. Соңғы 3 жылда мектепке дейінгі ұйымдардың желісі 801 нысанға көбейді. Ал соңғы бес жылда балабақшаларға кезектілік екі есеге кеміді, осылайша 2-6 жастағы балаларды мектепке дейінгі ұйымдармен қамту 91%-ды құрады. Осы жылы бұл көрсеткішті 92,5%-ға жеткізу көзделуде.