СҚО Есіл ауданының Покровка ауылында Есіл өзенінің көтерілуіне байланысты 24 үй су астында қалды. Зардап шеккен үйлердің барлық тұрғындары қауіпсіз жерге эвакуацияланды. Ауданда су тасқынына қарсы іс-қимыл бойынша жұмыстардың қалай жүріп жатқандығымен Мәжілістің «AMANAT» фракциясының мүшелері танысты.
Покровка арқылы «Петропавл-Жезқазған» республикалық трассасы өтеді. Су тасқынына қарсы штабтың хабарлауынша, жағдай бірнеше күн бұрын еріген су тас жолдан өткен кезде басталған. Бүгінгі таңда ауылдағы су деңгейі 1,5 метрден асады, бұл қауіп төндіреді. Жағдай Есіл өзенінде мұздың түсуімен де қиындайды.
Жергілікті эвакуациялық пункт Жәлел Қизатов атындағы жоғары ауыл шаруашылығы колледжінде орналасқан, алайда ол жерде адамдар жоқ. Барлық эвакуацияланған тұрғындар туыстарына қоныстанды. Мәжіліс депутаттары Еркебұлан Мәмбетов, Дмитрий Колода және Бақытжан Базарбек су басу аймағына түскен үйлердің иелерімен кездесіп, оларға шығындарды өтеу бойынша жағдайды түсіндірді. Олар сондай-ақ жануарларды эвакуациялау қалай жүреіп жатқанымен сұрады.
«Өтемақы Үкіметтің 2017 жылғы 19 желтоқсандағы қаулысына сәйкес беріледі. Төтенше жағдай басталғаннан бастап 30 күн ішінде жергілікті мемлекеттік органдарға өтемақы туралы өтініш беру қажет, 10 жұмыс күні ішінде залалдың мөлшері айқындалады. Өтемақы төлеуге арналған қаражат жергілікті атқарушы органдардың резервтерінде бар. Егер қосымша қаржыландыру қажет болса, ол мемлекеттік резервтен беріледі. Мемлекет көмек көрсетеді, ешкім назардан тыс қалмайды», - деді Дмитрий Колода.
Көршілес Николаевка ауылында 20-дан астам үй су астында қалды. Барлық тұрғындар жергілікті эвакуациялық пунктке қоныстанды. Мәжілісмендер сол жерде қалпына келтіру жұмыстарымен танысты. Қазір жергілікті атқарушы органдардың, тауар өндірушілер мен «AMANAT» партиясы еріктілерінің күшімен бөгет тұрғызылып жатыр. Техника жұмыс істеуде. Партияның аудандық филиалы жанынан Николаевка ауылының эвакуациялық пунктінде гуманитарлық көмек қабылдау пункті ашылды. Кейін депутаттар Қызылжар және Шал ақын аудандарына барып, Новоникольское, Қаратал ауылдарындағы және Сергеевка қаласындағы су торабындағы жағдаймен танысты. Бүгінгі таңда су қоймасындағы су деңгейі 4,2 метрден асады.
Солтүстік Қазақстан облысы бойынша барлығы 76 үй, 174 үй маңындағы аумақ су астында қалып, 634 адам қауіпсәз жерге көшіріліп, 1700-ден астам үй жануары құтқарылды. 19 жол учаскесінде су үстімен өтіп жатыр. Су басу көлемін азайту үшін аудандық және республикалық маңызы бар 8 жол учаскесі ашылды. Өңірде 305 бірлік техника, 156 мотопомпалар және 22 жүзу құралдары жұмыс істейді, 2 мыңға жуық маман жұмылдырылған. Болжам бойынша 1-2 тәулік ішінде үлкен су Петропавлға жетеді.