Алматы облысында лай көшкіні жүрді
Ұзынқарғалы өзенінде шамамен 2-3 бал деңгейінде су лайланды.
Алматы облысында толассыз жауған жаңбыр салдарынан беткейлерде ағын су пайда болды, деп хабарлады turkystan.kz inform.kz сайтына сілтеме жасап.
Алматы облыстық төтенше жағдайлар департаментінің мәліметінше, Қарғалы ауылынан жоғары сол жақ шатқалдан 2,4 шақырым қашықтықта «Ұзынқарғалы» өзенінің бассейнінде жергілікті жерде нөсер жаңбырдың қарқынды түсуі салдарынан көлбеу ағын пайда болды.
«Ол жергілікті маңызы бар жол арқылы өтіп, «Ұзынқарғалы» өзеніне құйылды. «Қарғалы ауылы – Ұзынқарғалы бөгеті» автожолының учаскесінде балшық массасы түсті, жол төсемі бүлінбеген, өту жолы бар», – делінген хабарламада.
Еңіс ағынының нәтижесінде Ұзынқарғалы өзенінде шамамен 2-3 бал деңгейінде су лайланды. Ауыз су жүйесіне лай судың түсуіне жол бермеу мақсатында Қарғалы ауылындағы абоненттерді Ұзынқарғалыдан су беретін ауыз судан ішінара ажырату туралы шешім қабылданды. Ауылдың қалған бөлігі ауыз суды терең ұңғымалар сорғыларынан алады. Жолды тазарту 22 наурызға жоспарланған.
