Шымкентте жолға таласқан автобустар апатқа ұшырады
Шымкент қаласында автобустар апатқа түсті
![Шымкентте жолға таласқан автобустар апатқа ұшырады](https://turkystan.kz/cache/imagine/1200/uploads/resized-images/2023/11/1700884114.jpeg)
Шымкентте екі автобус соқтығысып, оннан астам адам жарақат алды, деп хабарлады turkystan.kz КТК арнасына сілтеме жасап.
Жол апатына қоғамдық көліктердің жарысуы себеп болған.
«146-да отырған едім, бағдаршамда бұрылып тоқтады, адам түсірді. Бір адам шықты, екіншісі үлгермеді. Арт жақтан автобус келіп соқты. Екеуі жарысқан дей ме, білмеймін ғой. Апаттан көзім қарауытып кетті. Қатты соғылдым, жанымдағы адамдар ұшып жатты, құлап жатты», – дейді зардап шеккен жолаушы Бибіажар.
Оқиға қаланың әкімшілік іскерлік орталығында болды. Күндізгі сағат 11 шамасында қос автобустың ішінде жолаушы көп болмаған. Адамдарды түсіріп тұрған көліктің артына соғылған автобус жүргізушісі қазір тергеліп жатыр. Жарақат алғандардың тоғызы жедел жәрдем көлігімен ауруханаға жеткізілген. Жеңіл жарақат алған жетеуі ем-домнан соң үйіне жіберілсе, екі науқас нейрохирургия бөліміне жатқызылған. Оның біреуі 31 жастағы аяғы ауыр келіншек.
«Мамандар тексеріп қарады, бәрін алгоритм бойынша тексеріп жатқызды. Қазір жағдайы орташа ауыр. Қауіп жоқ», – дейді Шымкент №1 клиникалық ауруханасының хирургы Мадияр Дүйсенов.