Алматы облысында қаза тапқан 3 жасар бала: анасы тың дерек айтты
Үш жасар Заңғар ойын алаңында достарымен ойнап жүріп, күтпеген жерден жоғалып кеткен.
Алматы облысында 3 жасар бала балабақша аумағындағы кәріз құдығына құлап, көз жұмған. Марқұмның анасы оқиға туралы айтып берді, деп хабарлады turkystan.kz Астана арнасына сілтеме жасап.
Кәріз құдығының түбінен табылған кезде ол әлі де дем алып жатты. Бірақ ауруханаға жеткенше көз жұмыпты. Қайғылы оқиға Қырбалтабай ауылындағы балабақшада болды.
«Олар маған хабарлады да, байланыстан ажырап кетті. Мен келгенде ол енді тыныс алмады. Олар кәріз жабық болды деп сендірді. Бірақ оған сенбеймін. Олардың айтуынша, құдықты ашқанда, ұлым онда болмаған. Тек үшінші рет ашқанда табылыпты. Менің ойымша, ол бірнеше сағат бойы сонда жатты», – деді баланың анасы Ақбота Сатқынбаева.
Еңбекшіқазақ ауданының білім бөлімі бала құлаған сәттен бастап ол табылғанға дейінгі уақыт 23 минуттан аспады дейді. Балабақша меңгерушісі оқиға болған күннің ертесі күні жұмыстан шығарылды.
«Білім бөлімі басшылығының бұйрығымен меңгеруші жұмыстан босатылды. Осы оқиғаға қатысқандардың барлығы, соның ішінде тәрбиеші кешеден бастап жұмыстан босатылды. Құдық жабық болды. Кеше өзім келдім, көрдім», – деді Алматы облысы Еңбекшіқазақ ауданы білім бөлімінің бас маманы Зарина Бөлекбаева.
Мерт болған баланың туыстары құдық осыған дейін жабық болды дегенге сенбейді. Олар құдықтың қайғылы оқиғадан кейін ғана жабылғанына сенімді.
Осыдан кейін кәріз құдығының қандай екенін көруге келдік. Бұған дейін ол ашық болған. Үш жасар бала оны өзі аша алмайды, өзі сол жерге бара алмайды. Оны қоршау керек еді. Жұмыс істейтін тәрбиешілер мен менеджер кінәлі. Егер немқұрайлылық танытпаса, мұндай жағдай болмас еді, – деді Заңғардың атасы Әкімқожа Ынтымаев.
Қазір бұл оқиға бойынша полицейлер тергеу жүргізуде. Бақылау камераларынан бейнежазбалар тәркіленді. Балалардың өмірі мен денсаулығының қауіпсіздігін қамтамасыз ету жөніндегі міндеттерді тиісінше орындамағаны үшін қылмыстық іс қозғалды. Оған кінәлілер 5 жылға дейін түрмеге жабылады.
Ал кішкентай Заңғар 14 қыркүйекте жерленді.
