Сұлтан ЗАУРБЕК: Жылдың соңына дейін титул үшін жекпе-жек өткіземін

– Сұлтан, сізді Эдинбургтегі айтулы жеңісіңізбен құттықтаймыз. «Әр жек­пе-жек – маңызды емтихан» деген сө­зіңізді мысалға келтіре отырып, бұл ем­ти­ханды қандай бағамен аяқтаға­ныңызды сұрайын. Айқасыңыз көңі­ліңізден шықты ма? – Рахмет. Шотландиядағы кездесуім ой­дағыдай өтті. Жеңіс оңайлықпен келген жоқ. Бастысы жаттығу залында төккен тер текке кетпеді. Қарсыласымды тыңғылықты зерт­тедім. Алдымен командаммен Картер­дің мықты, осал тұстарын іздедік. Оның көп соққы жасайтын, бірінші нөмірмен жұдырықтасатын боксшы екеніне баса на­зар аударып, соған қарсы тактика ой­лас­тырдық. Джеб соққылармен көп жұмыс істе­дім. Жаттығу лагерінде үш ай бойы шың­далдым. Нәтижесін өздеріңіз көр­діңіздер. Нокаутқа түсірдім. – Жекпе-жек алдында әйгілі бок­с­шы Тайсон Фьюри жаттығу бөл­месіне келіп, сізге сәттілік тіледі. Сол туралы әң­гімелеп беріңізші. Кез­десу­ден соң Да­нияр Елеусіновтен бөлек та­ғы қан­дай боксшылар құттықтады? Ку­балық жаттықтырушы Хорхе Рубио мен Дэвид Колдуэллдың да ақжарма тілегін көрдік. – Тайсон Фьюримен бұрыннан таныс­пын. Өте тәжірибелі боксшы. Шаршы алаңға шығар кезде қолдау көрсеткеніне ри­замын. Маған «Қарсыласыңмен жұ­ды­рықтасқанда ақылмен жұмыс істе. Ашуға берілме. Салмақты, сабырлы болып, оны рингте толық бақылауға алсаң, қажет же­рін­де айла-тәсіліңді жүзеге асырсаң, қиын­дықсыз жеңіске жетесің», – деді. Оның сол сөзі мені жігерлендірді. Құттықтап жатқандардың қарасы көп. Сәкен Бибосынов, Жаңқош Тұраров, іні­лерім Санжар Тәшкенбай мен Махмұд Са­бырхан да жылы лебіздерін білдірді. Кубалық Хорхе Рубиоға келер бол­сам, ол – менің кәсіпқой бокстағы алғашқы бапкерім. Қазір Америкада бір­шама боксшыны жаттықтырып жүр. Осын­дай тілеулес жандардың барына қуа­намын. Дэвид Колдуэлл де әлеуметтік желі арқылы құттықтады. Қуанышыма ор­тақ­тасып жатқан адамдарға мың алғыс. Бұл тек менің емес, жанкүйерлерімнің де жеңі­сі. Олардың қолдауы маған үлкен күш бере­ді. Сонымен қатар мені жаттықтырып, күні-түні аянбай еңбек етіп жүрген бап­керлерімнің де қосқан үлесі зор. Жанымда маған сенетін жандардың болғаны да мен үшін жетістік. Солардың арқасында арман-мақсаттарыма ақырын адымдап келемін. – Айтпақшы, рингке көтерілер ал­дында керемет киім үлгісімен шық­қа­ныңызды көрдік. Алаш қайраткері, ұлт көсемі Әлихан Бөкейхановтың суреті бей­неленген жейдемен ерекше көзге түс­тіңіз. Бұл сәт кейін желідегі парақ­шаларда жарияланып, көп талқы­лан­ды. Алдағы жекпе-жекте өзіңізді тағы қандай жейдемен көруіміз мүмкін? – Қателеспесем, мен ол жейдені үш жек­пе-жекке арнайы алып бардым. Лон­дон­дағы YorkHall аренасында бірінші рет ки­дім. Болтонда өткен айқаста залда отыр­ған досымның сөмкесінде қалып кеткенін біл­дім. Бірақ кездесу аяқталған бойда ал­дырттым. Шотландиядағы бокс кешін отандық Qazsport телеарнасының тікелей эфирінен осы жейдемді көпшілік көрді деп ойлаймын. Негізі мен мұны арнайы тап­сырыс­пен жасатқанмын. Фотосын да өзім таң­дадым. Сол кезде «жейденің артына Әли­хан Бөкейхановтың туған жылын жа­зыңыз, қайтқан жылының орнына шек­сіздік белгісін қойыңыз» деп айтқанмын. Алаш қайраткері халықпен бірге мәңгі жа­сайды дегенді сол жазу арқылы көр­сет­кім келген. Бірақ тапсырыс алған адам сө­зім­ді дұрыс түсінбеді ме, жоқ есінен шығып кет­ті ме, қайтқан жылын жанына қоса жа­зып­ты. Ендігі жолы рингке қандай жей­демен шығатынымды уақыты келгенде кө­ре жатарсыздар. Бір нәрсе анық, алдағы кез­десулерімде де ел үшін аянбай еңбек ет­кен ұлт мақтаныштарын дәріптеуді жал­ғастыра беремін. – Тегіңізді журналистер әр жерде әр­түрлі жазып жүр. Заурбек пе, Зәуір­бек пе? – Менің тегім – Заурбек. Кейбір қазақ пор­талдары Зәуірбек деп жазып жүргенін өзім де байқадым. Заурбек дегенді орысша деп түсініп, өздерінше қазақшалаған түр­лері ғой. – Сізді бокс жанкүйерлері енді-енді та­нып келе жатыр. Спорттық ман­са­быңды бокстан бастадыңыз ба? Киіну стиліңізге қа­ра­сам, муай-тай, кик­боксингпен айна­лыс­қан секілдісіз. Өзіңіз туралы айтып бе­­­­ріңізші. – 10 жасымнан бастап кикбокспен ай­на­лыстым. Осы спорт түрінен спорт шебері бол­дым. 4 жылдай муай-тай және кик­бок­сингтен еңбегі сіңген жаттықтырушы Қуа­ныш Сұлтанғалидың қол астында жаттық­тым. 3 рет Қазақстан және спартакиада чем­пионы болдым. Кейін боксқа келдім. Бай­махамбет Жақыпбек атты бапкердің тәлі­мін көрдім. Содан соң Мырзағали Айт­жанов ағамыздың қарамағында шебер­лігім­ді шыңдадым. Әуесқойда жастар ара­сын­да Азия чемпионы, әлем чемпио­на­тының күміс жүлдесін жеңіп алдым. Со­ны­мен қатар Президент кубогін иелендім. Ислам ойындарының қола жүлдесін еншіледім. Әуесқой бокста көп жүрмедім. Ұсыныс түскеннен кейін кәсіпқойға ауы­сып кеттім. WBC тұжырымы бойынша жас­тар арасында әлем чемпионы, WBO тұ­жырымы бойынша Еуропа чемпио­ны­мын. – Елге ораларда Головкинмен кез­дес­кен екенсіз. GGG-мен сөйлесе ал­дыңыз ба? – Геннадий Головкинмен Германияның әуе­жайында кездейсоқ кездесіп қалдық. Эдин­бургте жұдырықтасқанымды, жеңіске жет­кенімді білетінін айтты. Жекпе-жегімді кө­ріпті. Он бесінші жеңісіммен құт­тық­та­ды. Үздік боксшыдан мақтау естимін деп ой­лаған жоқпын. Оған да алдағы айқас­тарында жеңіс тілеймін. – Англияда қашаннан бері жат­ты­ғып жүрсіз? Ол жақтың Қазақстаннан артықшылығы неде? АҚШ-қа бар­ғыңыз келе ме? Сізді жекпе-жекке дайын­дайтын қазіргі бапкерлік құрам мен командаңыз туралы білгіміз ке­леді. — Лондонда жүргеніме 5 жылға жуық­та­ды. Бұл елге келгенде, мен жаңа коман­да­мен, жаңа достармен та­ныстым. Олар ма­ған көп көмектесті. Мені қолдап, демеу бол­ғандары үшін алғысым шексіз. Біз тек дос қана емеспіз, үлкен отбасыға ай­нал­дық. Англияда бокс жақсы жолға қойылған. Жаттығу әдісі де біздің елдегіден өзгеше. Спар­рингке шығатын қарсылас іздеп қи­налмайсың. Бір күннің өзінде 4-5 бокс­шы­мен жұдырықтасамын. Әртүрлі стильде өнер көрсететін спортшылар жеткілікті. Бап­керім әлем чемпионын шығарған тәжі­ри­белі маман. Ауыр салмақта бағын сынап жүрг­ен Мартин Маколе атты шәкірті бар. Ке­лесі жылы Усик немесе Тайсон Фьюримен жек­пе-жек өткізуді жоспарлап отыр. Жал­пы, командада боксшы көп. Менің сал­ма­ғымда 2-3-еуі бар. АҚШ-қа баруды келешектің еншісіне қалдырайын. Америкалық бокстың қыр-сырын үйрену үшін сол елдегі мексикалық бок­сшылармен спарринг өткізетін шы­ғар­мын. Уақыты келгенде көрерміз. Жаңа жоспар, жаңа дайындық жүйесі чем­пион­дық шыңға ұмтылыс жасаған боксшы­ның бойына сенім мен жі­гер сыйлайды. – Сізді кей жан­күйер­­ле­ріңіз Мэнни Пакьяоға ұқ­сатады. Өзіңіз кіш­кен­тайыңыздан Майк Тай­сонға еліктеп өсіп­­сіз. Тағы қан­дай бок­сшы­лар­дың бокстасу сти­лі ұнай­ды? – Пакьяоға ұқса­сам жаман боксшы бол­ма­ға­ным ғой (күл­ді). Тайсон­ға келер бол­сақ, Майк – бала кезімнен теледи­дар­дан көріп өскен боксшым. Шаршы алаңға шығар сәтін асыға күтетінмін. Еліктедік, сол спортшы сияқты та­нымал бол­ғым келді. Келекшекте аңыз бок­сшымен жолыққым келеді. Сәтін салғай дейміз. Маған тағы бір бокс­шының бокстасу стилі ұнайды. Ол – әйгілі Флойд Мейвезер. Жақында абсолютті чемпион болған Теренс Кроуфордтың да жан­күйерімін. Ақылды боксшылардың жұ­дырықтасу мәнеріне көп назар аудара­мын. Солардан өзіме керегін аламын. – Boxrec.com сайтындағы көрсет­кіш бойынша Қазақстанның үздік 10 боксшысының тізіміне ендіңіз. Ев­гений Павлов пен Батыр Жүкембаевты артқа тастап, тоғызыншы орынға кө­теріліпсіз. Ендігі мақсат қандай? – Boxrec.com сайтынан әлі өзімді іздеп көр­ген жоқпын. Қазақстандағы он үздік бокс­шыға кірсем бұл да еңбектің өтелгені шы­ғар. Негізі мен отандастарымызбен жа­рысқан емеспін. Басты мақсат – өз ди­ви­зио­нымда әлем чемпионы болу. Қазір мен WBI рейтингі бойынша ТОР-7-де тұрмын. Әрі қарай өз дивизионымдағы мық­ты­лар­дың ізіне түсемін. Осы салмақтың чем­пио­нымен шығуға бар күшімді саламын. – Кәсіпқой боксқа ауысқаныңызға 5 жылға жуықтапты. Әр кездесуіңізді әр елде өткізіп жүрсіз. Біреуі Англия­ның Болтон қаласында болды. Жуыр­дағысы Шотландияның Эдинбургінде өтті. Айқасыңызды Қазақстанда ұйым­дастыру ойда бар ма? Жылдың соңына дейін Заурбекті шаршы алаңнан көре аламыз ба? – Алға жүруден тоқтаған емеспін. Мақ­са­тыма жету үшін аянбай тер төгуім керек. Про­моутерім Англияда болғаннан кейін үне­мі сол жақта жүремін. Осы елде таны­мал болуды көздеп отырмын. Қазір бұл мем­лекетте де бокстың беделі жоғары. Джош­уа, Фьюри секілді мықты боксшылар көп. Қазақстанда жекпе-жек өткізу әзірге жос­парда жоқ. Бұған дейін кезінде елімізде кез­десу ұйымдастырдық. Әлем чемпионы бол­сам, мүмкін, Шымкент қаласында ай­қас өткізермін. Промоутерлерімнің «өзің­нің қалаңда бір кездесу өткізейік» деген ұсынысын да естіп жүрмін. Бірақ ол әзірге жақын уақытта емес. Жылдың соңына дейін екі айқасқа шығуым керек. Қазан айының басында, жел­тоқсан айының аяғына таман деп топ­шылап отырмыз. Жақында командаммен сөйлестім. Мен дайын екенімді айттым. Екі кездесудің бірі титул үшін болады. Маған «Қазақтың Сұлтаны» деп айдар тақ­қан жанкүйерімнің ықыласына шексіз разы­мын. Менің жетістігім – елімнің абы­ройы. Баршаңызға мың алғыс. Жеңісті күн­деріміз көп болсын! – Әңгімеңізге рахмет. Кәсіпқой бокста мерейіңіз асқақтай берсін!

Сұхбаттасқан Абылайхан ЖҰМАШ