Мейрам Қажыкен Семейдегі салалық кәсіподақ басшыларымен кездесті

Семейде Абай облысының кәсіподақ жетекшілері ҚР Президенттігіне кандидат Мейрам Қажыкенмен кездесті деп хабарлады turkystan.kz. Олар әскери қызметшілердің, денсаулық сақтау саласының, ауыл шаруашылығы және мемлекеттік қызметтегі жұмысшылардың мүдделері жайын сөз етті. Алғашында  кандидат өзінің сайлауалды бағдарламасын таныстырып, кейін қойылған сұрақтарға жауап берді. Азаматтық қоғамның бір бөлігі ретінде тәуелсіз кәсіподақ қозғалысының дамуы жайындағы пікір алмасу өтті. Осыған байланысты М.Қажыкен әр түрлі саладағы жұмыскерлер мен жұмыс берушілердің құқықтары және мүдделерін қорғау жөніндегі ұйымдарды қалыптастыру үшін қолайлы жағдайлар жасау қажеттігін атап өтті.

«Кәсіподақтардың мәртебесін көтеріп қана қоймай, нығайту керек деп санаймын. Бұл менің ұстанымым. Әлеуметтік әріптестер: мемлекеттік және жұмыс беруші ұйымдар арасындағы  қатынастарда кәсіподақтардың тәуелсіздігіне қол жеткізу керек.  Кәсіподақтарды қоғамдық ұйым ретінде саяси және экономикалық шешімдер қабылдау жүйесіне тарту қажет», - деп атап өтті кандидат.

Жалпы, жұмыс берушілер де, кәсіподақтар да мемлекетпен тең дәрежеде болатын әлеуметтік әріптестікті дамыту қажет.

«Біз жұмыс берушілер де қауымдастыққа немесе ұйымға бірігуі керек деп санаймыз. Олар бөлек әрекет етсе, өз мүдделерін қорғай алмайды, ал бірігу арқылы мемлекеттік органдармен, әсіресе Үкіметпен диалогта өз құқықтарын қорғау мүмкіндігі пайда болады», - деді М.Қажыкен.

Оның айтуынша, жұмыс берушілер мен қызметкерлер даулы мәселе бойынша келісе отырып, әлеуметтік әріптестіктің үшінші тарапына – мемлекеттік органдарға жүгіне алады. Осылайша, қолданыстағы нормалардың, Мемлекеттік актілердің, қызметтерді мемлекеттік сатып алу туралы шарттардың және т.б. өзгеруіне әсер етуге жол ашылады.

«Біз әлеуметтік серіктестік туралы заңды әзірледік және оны Үкіметке тапсырдық. Қазіргі уақытта бізде мұндай заң жоқ (2007 жылы «әлеуметтік әріптестік туралы» заң күші жойылды), оның нормалары Еңбек кодексіне көшірілді», - деп қорытындылады М.Қажыкен.

Кәсіподақ басшылары, олардың жұмыстарына мемлекеттік органдар мен жұмыс берушілердің араласатынын айтып,  шағымданды. Сондай-ақ олар кәсіподақ басшыларының дауыс беру арқылы сайланбай, тағайындалатынын атап өтті. Әңгімелесу барысында тараптар еңбек заңнамасында толыққанды еңбек демалысын алу, ем қабылдау парақтарындағы қаражаттарды төлеу және т.б. шарттарды сақтау мәселелерін талқылады. Олар бұл бағыттағы заңды әзірлеп, қабылдау және әлеуметтік институтты дамыту қажет деген  қорытындыға келді.

Серіктес жаңалықтары