50461
Үстінен іс қозғалған полиция бөлімінің бастығы жаңа қызметке тағайындалды
Үстінен іс қозғалған полиция бөлімінің бастығы жаңа қызметке тағайындалды
Аса ірі көлемде алаяқтық жасады деген күдікке ілінген Түркістан облысы ІІД Түлкібас аудандық полиция бөлімінің бұрынғы бастығы Данияр Мейірхан жаңа қызметке келді. Ол Шымкент қалалық патрульдік полиция полкінің командирі болып тағайындалды деп хабарлады turkystan.kz Zakon.kz сайтына сілтеме жасап.
Ол өзінің Facebook парақшасында Түлкібас ауданының тұрғындарына қолдау көрсеткені үшін алғысын білдірді.
«Осы үш жылда мен Түлкібас ауданы тұрғындарының ерекше қолдауына ие болдым. Жеке құраммен бірге сеніп тапсырылған аумақта тәртіп сақтау қиын болған жоқ. Полицейлердің әрекеттеріне құрметпен қарағаны үшін жергілікті тұрғындарға алғысымды білдіремін. Менің әріптестерім ауданда құқық бұзушылықты төмен деңгейде ұстайтынына сенімдімін. Ал маған басшылық Шымкентте тәртіп орнатуды тапсырды, алға жылжу уақыты келді», - дейді Данияр Мейірхан.Шымкент қалалық ІІД Данияр Мейірханның Патрульдік полиция полкінің командирі болып тағайындалғанын растады. ҚР Сыбайлас жемқорлыққа қарсы іс-қимыл агенттігінің баспасөз қызметі Zakon.kz-ке Шымкент бойынша Сыбайлас жемқорлыққа қарсы қызметтің «Данияр Мейірханға қатысты сотқа дейінгі тергеуді» ҚР Қылмыстық іс жүргізу кодексі 35-бабы 1-бөлігі 2-тармағына сәйкес тоқтатқанын хабарлады.
«Данияр Мейірханды тәртіптік жауапкершілікке тарту туралы материалдар Түркістан облысы Полиция департаментіне жолданды», - дейді Сыбайлас жемқорлыққа қарсы қызметтің баспасөз қызметі.Басқарма сотқа дейінгі тергеудің басқа деректерін жария етуге жатпайтынын атап өтті. 2022 жылдың сәуір айының соңында Шымкент қалалық ІІБ Ішкі қауіпсіздік бөлімі Түркістан облысы Түлкібас аудандық ішкі істер басқармасының бастығы Данияр Мейірханды ұстады. Ол автосалонға қатысты аса ірі көлемдегі алаяқтық әрекеті үшін күдікті болды. Мамыр айының басында Данияр Мейірханның 40 миллион теңге кепілмен босатылғаны белгілі болды. Кейін ол қызметінен уақытша шеттетілді.
