Artsport جوباسى جابىلمايدى – د.اباەۆ

مادەنيەت جانە سپورت ءمينيسترى داۋرەن اباەۆ شىمكەنت قالاسىنىڭ تۇرعىندارىمەن كەزدەستى. مينيستر مەملەكەت پەن قوعام اراسىنداعى ديالوگتىڭ ماڭىزدىلىعىن اتاپ ءوتىپ، وزەكتى سۇراقتارعا جاۋاپ بەردى دەپ حابارلادى turkystan.kz مينيسترلىكتىڭ رەسمي سايتىنا سىلتەمە جاساپ.

«پرەزيدەنت تاپسىرماسى بويىنشا مەملەكەتتىك ورگانداردىڭ باسشىلارى حالىقپەن كەزدەسۋدى وڭىرلەردە وتكىزىپ جاتىر. بۇل  – مەملەكەت پەن قوعامنىڭ ءوزارا سەنىمى مەن قۇرمەتىنە نەگىزدەلگەن جاڭا ساياسي مادەنيەتتى قۇرۋداعى وتە ماڭىزدى قادام. سوندىقتان دا بۇگىن سىزدەردى تولعاندىراتىن بارلىق سۇراقتارعا تىكەلەي جاۋاپ بەرۋگە كەلدىم»، – دەدى مينيستر.

داۋرەن اباەۆ وزەكتى ماسەلەلەرگە ەگجەي-تەگجەيلى توقتالدى. اتاپ ايتقاندا، ول وتكەن جىلى مەگاپوليستە 9 مادەنيەت نىسانىنا جوندەۋ جۇمىستارى جۇرگىزىلگەنىن حابارلادى. بيىل تاعى 10 نىسان جوندەۋدەن ءوتىپ جاتىر. ايتا كەتەرلىگى، شىمكەتتە كونگرەسس حولل مەن وقۋشىلار سارايىنىڭ قۇرىلىسى جۇرگىزىلۋدە. مينيستر مادەنيەت سالاسى قىزمەتكەرلەرىنىڭ ەڭبەكاقىسى تۋرالى سۇراقتارعا دا جاۋاپ بەردى.

«مادەنيەت جانە ارحيۆ ءىسى ۇيىمدارى قىزمەتكەرلەرىنىڭ ەڭبەكاقىسى ورتا ەسەپپەن ءار جىل سايىن 20%-عا وسەتىن بولادى. بۇل جۇمىس 2025 جىلعا دەيىن جۇرگىزىلەدى، ياعني وسى كەزەڭدە ەڭبەكاقى كولەمى 100%-عا ارتادى. مەملەكەت باسشىسىنىڭ جارلىعىنا سايكەس 1 شىلدەدەن باستاپ «ۇلتتىق» مارتەبەسى بار مادەنيەت مەكەمەلەرى قىزمەتكەرلەرىنىڭ ەڭبەكاقىسى 75%-عا ارتاتىنىن اتاپ وتكىم كەلەدى»، – دەدى مادەنيەت جانە سپورت ءمينيسترى داۋرەن اباەۆ.

ءمينيستردىڭ ايتۋىنشا، ەلىمىزدە كينو ءوندىرىسى قارقىندى دامىپ كەلەدى. ماسەلەن، «قازاقفيلم» كينوستۋدياسىن جاڭعىرتۋ جۇزەگە اسىرىلىپ جاتىر، «قازاقانيماتسيا» شىعارماشىلىق بىرلەستىگىن قۇرۋ بويىنشا جۇمىس جۇرگىزىلىپ وتىر. بۇل بىرلەستىك بيىل كورەرمەندەرگە 10 پيلوتتىق جوبا ۇسىنادى. رەيتينگى جوعارى انيماتسيالىق فيلمدەر مەن كينوكارتينالاردى قازاق تىلىنە دۋبلياجداۋعا قاراجات بولىنەدى.

«سۇراق-جاۋاپ» سەسسياسى اياسىندا مينيسترگە ماڭىزدى سۇراقتار قويىلدى، ولاردىڭ باسىم بولىگى مادەنيەت سالاسىنا جانە سپورت سەكتسيالارى مەن شىعارماشىلىق ۇيىرمەلەردى جان باسىنا قارجىلاندىرۋعا قاتىستى بولدى. داۋرەن اباەۆ Artsport جوباسى جابىلمايتىنىن ايتتى، تەك تالاپتارعا تۇزەتۋلەر ەنگىزىلەتىنىن جەتكىزدى.

حالىقپەن كەزدەسۋدەن كەيىن داۋرەن اباەۆ باق وكىلدەرى ءۇشىن ارنايى بريفينگ وتكىزىپ، ازاماتتاردى قابىلدادى. كەزدەسۋگە 500-گە جۋىق ادام قاتىستى.

Back to top button