Әділеттілік пен ашықтықты қалаған халықтың сұранысы орындалды - Нұржан Жетпісбаев

AMANAT партиясы жанындағы Жастар қанатының жетекшісі Нұржан Жетпісбаев Конституцияға енгізілетін өзгерістер мен толықтырулар бойынша өткен референдумға қатысты өз пікірін білдірді деп хабарлады turkystan.kz.

«Ата Заңға өзгерістер енгізу бойынша жалпыхалықтық референдум өтіп, нәтижелері шықты. Көрсеткіштер бойынша халықтың белсенділік танытқаны көңіл қуантады. Үйде немесе басқа жерде бұғып қалмай, елдің болашағын шешуші сәтте өз азаматтық көзқарастарын таныта білді. Ел азаматтарының саяси сауаттылық деңгейінің едәуір көтерілгендігін референдум нәтижелеріне қарап айтуға болады. Мемлекет басшысының осы референдумды жариялап, өткізуі - халықтың үніне құлақ асу. Әділеттілік пен ашықтықты қалаған халықтың сұранысы орындалды деуге болады. Әрине, бұл бастамасы - толыққанды демократияландыруға апарушы қадамдар», - деді Нұржан Жетпісбаев.

Оның айтуынша, өзгерістер мен түзетулер енді, Жаңа Қазақстандамын деп ойлау да қателік.

«Дайын күйінде бола салатын дүние жоқ. Тұтас елдің Конституциясын қас-қағым сәтте өзгерте салу оңай жұмыс емес. Референдум нәтижелеріне сүйене отырып, сарапшы мамандардың пікірін ескеріп, барлығы түгелдей сүзгіден өтпек. Парламент тарапынан керекті шаралар қабылданып, заңнамаларды талапқа сай бекітуді күтеміз. Аталған процестердің бүкпесіз жүзеге асырылуын халық күтуде. Оның ішінде, жастарымыздың алар орны ерекше екенін де ұмытпаған жөн. Жастар – Жаңа Қазақстанды қолдайды, оған сенері сөзсіз. Екінші Республиканы қалыптастыруда жастар негізгі тетік болып табылады», - деді AMANAT партиясы жанындағы Жастар қанатының жетекшісі.

Нұржан Жетпісбаевтың айтуынша, осыған орай, жастардың талабына сай бола отырып, олармен кері байланыс орнатуды партия да, партияның Жастар қанаты да жолға қойды.

«Еліміздегі ең ірі саяси күш ретінде партия референдум бойынша жан-жақты түсіндірме жұмыстарын өткізді. Аймақтардағы тұрғындар, әр саланың жұмысшы өкілдері, түрлі санаттағы жастардың белгілі үлесінің референдумнан хабардар болуы – партияның non-stop режимінде жұмыс жүргізгендігі деп санаймын. Жас депуттар корпусы ауыл-аймақтарда түсіндіру, ал Жастар қанаты жанындағы «Kenes Ortalygy» жобасы аясында үгіт-насихат жұмыстары жүргізіп, 500 мыңнан астам жасты қамтығанын атап өткен жөн. «Заманына қарай заңы, тоғайына қарай аңы», - деп қазақ атамыз мақалдап бекер айтпаған. Елдегі соңғы орын алған жағдайлар – Жаңа Қазақстан концепциясының туындауына алып келді. Кезек күттірмейтін заманда, қойылған міндетті абыроймен атқаруда біріге жұмыс істейік», - деді ол.

 

Серіктес жаңалықтары