Елімізде автокөлікті сақтандыру тарифі өзгереді

Бүгін Мәжіліс отырысында «Қазақстан Республикасының кейбiр заңнамалық актiлерiне сақтандыру нарығын және бағалы қағаздар нарығын реттеу мен дамыту мәселелері бойынша өзгерiстер мен толықтырулар енгiзу туралы» Заң жобасын қарау кезінде елдегі автокөлік сақтандыру тарифі өзгеретіні белгілі болды, деп жазды turkystan.kz. Қаржы нарығын реттеу және дамыту агенттігінің төрайымы Мәдина Әбілқасымова жаңа заңға сәйкес, міндетті автокөлік сақтандыру бойынша икемді тарифтеу жүйесі қалай енгізілетінін түсіндірді.

«Қолданыстағы сақтандыру тарифтері заңнамалық тұрғыдан 2007 жылы енгізілді және сол кезден бері жаңартылған жоқ. Икемді тарифтеу жүйесі Қазақстан өңірлері бойынша жолда болатын апаттарды ескеріп, сақтандыру тарифтерін автоматты түрде жаңартуға мүмкіндік береді. Жаңа заңға сәйкес екі коэффициент бойынша тарифтерді анықтау көзделген. Біріншісі, шығынға байланысты енгізілетін тариф болса, екіншісі, бонус-малус қағидаты бойынша іске аспақ. Біз икемді сақтандыру жүйесіне көшеміз. Бұл ретте өңірлердегі жол апаты жағдайын ескере отырып, шығынның орташа коэффициентін есептеуді ұсындық», − деді агенттігінің төрайымы.

Егер статистикаға қарайтын болсақ, соңғы 5 жылда сақтандыру шығыны мен жол көлік оқиғалары әр өңірде әрқалай екенін көруге болады. Мысалы, Солтүстік Қазақстан облысында бұл көрсеткіш 20% болса, Алматы қаласында – 58%, Нұр-Сұлтан қаласында − 61%. Соған сәйкес, тариф бағасы да әрқалай болуы керек. Әлемдік тәжірибеде сақтандыру шығынының орташа мөлшері – 65%. Бұл көрсеткіш сақтандыру қорларында белгіленеді. Егер өңірде жол апаты жағдайы аз орын алатын болса, сақтандыру қоры тариф бағасын төмендетуі тиіс. Мәдина Әбілқасымованың айтуынша, жаңа заң жобасы күшіне енгеннен кейін жол апаты аз өңірлерде сақтандыру тарифінің бағасы төмендейді. Ал Алматы мен Нұр-Сұлтан қаласында жол-көлік оқиғаларының жиі орын алуына байланысты тариф бағасы қазіргі межеде сақталады. Белгілі болғанай, шығынға байланысты енгізілетін автокөлік тарифі мен бонус-малус қағидаты бойынша актокөлікті сақтандыру 2023 жылы қолданысқа енгізілуі мүмкін.

Серіктес жаңалықтары