قۋاڭشىلىق: پرەزيدەنت اكىمدەرگە ناقتى تاپسىرما بەردى

مەملەكەت باسشىسى قاسىم-جومارت توقاەۆ ماڭعىستاۋ جانە قىزىلوردا وبلىستارىنىڭ اكىمدەرىمەن وڭىرلەردەگى سانيتارلىق-ەپيدەميولوگيالىق جانە الەۋمەتتىك-ەكونوميكالىق جاعدايدى تەلەفون ارقىلى تالقىلادى، دەپ حابارلادى پرەزيدەنتتىڭ ءباسپاسوز حاتشىسى بەرىك ءۋالي Facebook پاراقشاسىندا.

ماڭعىستاۋ وبلىسىنىڭ اكىمى سەرىكباي ترۇموۆ COVID-19-عا قارسى كۇرەس، ونىڭ ىشىندە حالىقتى ۆاكتسيناتسيالاۋ، سونداي-اق مال ازىعىمەن قامتاماسىز ەتۋ بويىنشا قابىلدانىپ جاتقان شارالار تۋرالى باياندادى.
پرەزيدەنت ءوڭىر تۇرعىندارىن ۆاكتسيناتسيالاۋ قارقىنى بويىنشا جۇمىستى كۇشەيتۋدى، سونداي-اق وندىرىستەر مەن مۇناي سەرۆيستىك كاسىپورىندارداعى الەۋمەتتىك ءال-اۋقات بويىنشا شارالار قابىلداۋدى تاپسىردى.

«مەملەكەت باسشىسى قاتتى قۇرعاقشىلىق پەن جايىلىمداردا وسىمدىكتەردىڭ جەتىسپەۋى سالدارىنان قالىپتاسقان جاعدايعا بايلانىستى ۇكىمەتكە اكىمدىكپەن بىرلەسىپ فەرمەرلەر مەن اۋىل تۇرعىندارىن قولداۋ بويىنشا قاجەتتى شارالار قابىلداۋدى تاپسىردى»، — دەپ جازدى بەرىك ءۋالي.

قىزىلوردا وبلىسىنىڭ اكىمى گۇلشارا ابدىقالىقوۆا كوروناۆيرۋس ينفەكتسياسىمەن كۇرەس بويىنشا جۇرگىزىلىپ جاتقان جۇمىستار تۋرالى ەسەپ بەردى. سونداي-اق، ابدىقالىقوۆا ءوڭىردى سۋارمالى سۋمەن قامتاماسىز ەتۋ تۋرالى ايتتى. بۇگىنگى تاڭدا سىرداريا ارقىلى وبلىسقا سەكۋندىنا 550 تەكشە مەتر سۋ كەلەدى. شارۋاشىلىق جۇرگىزۋشى سۋبەكتىلەرگە سۋارمالى سۋ بەرۋدىڭ كەزەكتىلىگى مەن كولەمىن ايقىندايتىن جۇمىس كوميسسياسى قۇرىلدى.
ارال اۋدانىندا 12 شىلدەدە توتەنشە جاعداي جاريالاندى. وسىعان بايلانىستى ۇكىمەت رەزەرۆىنەن جانە وبلىستىق بيۋدجەتتەن جەمشوپتى سۋبسيديالاۋعا، سونداي-اق كانالداردى تازالاۋعا جانە ۇڭعىمالاردى بۇرعىلاۋعا قاراجات ءبولۋ تۋرالى شەشىم قابىلداندى.
مەملەكەت باسشىسى قىزىلوردا وبلىسىنىڭ اكىمىنە حالىقپەن ۆاكتسينا بويىنشا اقپاراتتىق-ءتۇسىندىرۋ جۇمىستارىن كۇشەيتۋدى، مۇناي-گاز سەكتورىنىڭ پروبلەمالارىن شەشۋ بويىنشا كەشەندى ءتاسىل جۇرگىزۋدى، سونداي-اق قىزىلوردا وبلىسىنىڭ زارداپ شەككەن اۋداندارىنىڭ شارۋاشىلىق جۇرگىزۋشى سۋبەكتىلەرىنە جەم-ءشوپ دايىنداۋدى قامتاماسىز ەتۋدى تاپسىردى.

ۇقساس جاڭالىقتار

Back to top button