Қазақстанда террористерге арнайы абақты керек пе?
Қазақстанда террористерге арнайы абақты керек пе?
Депутаттар терроризм және экстремизм баптары бойынша сотталғандарды қамайтын арнайы колониялар немесе түрме iшiнде жеке аймақ құруды ұсынып отыр. Бүгiн Мәжiлiсте өткен жалпы отырыста депутат Ирина Смирнова осындай сауалды Үкiмет басшысы Бақытжан Сағынтаевқа жолдады деп хабарлады BNews.kz.
Депутаттың айтуынша, бүгiнде сотталушылардың темiр тордың ар жағынан шыққаннан кейiн қоғамға қайта бейiмделуi аса өзектi түйткiл. Ал кейбiр экстремистiк ұйымдар мемлекеттiк құрылымдар сияқты емес, бұл мәселенi мықтап қолға алған.
«Олар өз адамдарына және түрмеден босап шығып, қатарына жаңа қосылғандарды жұмыспен қамтып, баспана бередi. Отбасын құруға көмектеседi. Яғни, бостандыққа шыққан сотталғандарға материалдық және психологиялық жәрдемдi мемлекет пен қоғам емес, экстремистiк топтар көрсетеді», – дейдi депутат.
Қазiргi уақытта заңды түрде террористiк және экстремистiк қылмыс үшiн жаза мерзiмiн ұлғайту көзделiп отыр.«Бұл түрмедегi әлеуеттi террористер мен экстремистер санының өсуiне әкелуi мүмкiн» – деп қауiптенедi депутат.
«Осыған орай, Қазақстанда терроризм және экстремизм баптары бойынша сотталғандар үшiн арнайы колониялар немесе түрме iшiнде жеке аймақ құру мәселесiн тез арада шешу керек. Бұл радикалдық идеялар, әсiресе, жастар арасында кеңiнен тарамауы үшiн керек», –деп түйiндедi сөзiн И.Смирнова.
