Үкіметінің қаулысымен ШҚО-дағы бірқатар нысандарға қазақша атау берілді

Қазақстан Республикасы Үкіметінің қаулысымен Шығыс Қазақстан облысындағы әуежай, колледж және мектептерге ұлы адамдардың аты беріліп, бірқатарының атауы өзгерді, – деп хабарлайды primeminister.kz.

«Шығыс Қазақстан облысының кейбір объектілеріне атау беру және қайта атау туралы» Қазақстан Республикасы Үкіметінің 2020 жылғы 23 сәуірдегі №241 қаулысымен бірқатар нысанға жаңа атау берілді.

Өскемен қаласындағы Ағылшын тілін тереңдетіп оқытатын №38 гимназиясына Лев Гумилевтің есімі, №39 орта мектепке Ыбырай Алтынсариннің есімі, Шығыс Қазақстан гуманитарлық колледжіне Абайдың есімі берілді.

Семей халықаралық әуежайына Абайдың есімі, Семейде қаласындағы №47 мектепке Ахмет Байтұрсынұлының, №37 гимназияға Ыбырай Алтынсариннің, №39 орта мектепке Әлихан Бөкейханның, №34 мектепке Бауыржан Момышұлының, №2 мектепке Қаныш Сәтбаевтың есімі берілді.

Шемонаиха ауданындағы №5 мектеп Ахмет Байтұрсынұлының, №4 мектеп Шәкәрімнің есімімен аталды. Сонымен қатар, Семейдегі Пригород мектебі Жүсіпбек Аймауытов атындағы жалпы орта білім беретін мектеп болып, Бесқарағай ауданындағы Березовка орта мектебі Бозтал орта мектебі, Үлкен Владимировка орта мектебі Қайрат Рысқұлбеков атындағы орта мектеп болып өзгертілді. Шемонаиха ауданындағы «Қызыл Шемонаиха мектебі» Ыбырай Алтынсарин атындағы мектеп, «Михайловка орта мектебі» Шоқан Уәлиханов атындағы мектеп болып өзгерді.

Сондай-ақ, «Прапорщиково мектебі» Дінмұхамед Қонаев атындағы мектеп, «Переваловка мектебі» Мәлік Ғабдуллин атындағы мектеп, «Бобровка мектебі» Ахмет Байтұрсынұлы атындағы мектеп, «Ушанов орта мектебі» Бауыржан Момышұлы атындағы, №2 Ақсуат орта мектебі Қожагелді батыр атындағы мектеп болып қайта аталды.

Айта кетерлігі, ҚР Премьер-Министрі Асқар Мамин қол қойған қаулы ресми жарияланған күнінен бастап қолданысқа енгізілді.

Ұқсас жаңалықтар

Back to top button