Блок-бекеттерден 2000 теңгеге адам өткізбек болған алаяқ ұсталды

Алматыда 2000 теңгеге блок-бекеттері арқылы адамдарды өткізуге тырысқан азамат ұсталды. Бұл туралы онлайн брифинг барысында қалалық Полиция департаменті Әкімшілік полиция басқармасының басшысы Жандос Мұраталиев айтты.

ҚазАқпараттың мәліметінше, карантин жарияланған екі күнде қала тұрғындары арасында ақша берген жағдайда блок-бекет арқылы өтуге болады екен деген ақпарат тараған көрінеді.

«Осы орайда біз арнайы топ құрып, азаматтарды өткізуге жәрдем беріп жүрген жолаушы тасымалдаушыны ұстадық. Ол азаматтарға 2000 мың теңге берген жағдайда бекеттен өткізуге уәде беріп, алданған азаматтарды бекет маңына әкеліп, ізін суытатын болған. Өзі облысқа өте алмады. Оған қатысты қазір алаяқтық бабы бойынша қылмыстық іс қозғалды. Тергеу жүргізіліп жатыр», – деді Ж.Мұраталиев.

Оның айтуынша, қазіргі уақытта бұл блок-бекеттердің жұмыс барысы тұрақты, көліктер және азаматтар қалыпты тәртіппен өткізіліп, тәртіп сақшылары азаматтармен және көлік жүргізушілерімен түсіндіру жұмыстарын жүргізіп жатыр. Түсіндіру жұмыстары дыбыс күшейткіш құралдары арқылы да жүзеге асырылуда.

«Азаматтар өздерінің жеке қауіпсіздігі жайлы, санитарлық талаптардың сақталуы, жүк көліктерінің блок бекеттер арқылы қандай құжаттармен өткізілуі және жауапкершілігі жайлы және төтенше жағдай кезінде заң талаптарын бұзған немесе билік өкілдеріне бағынбаған жағдайда әкімшілік немесе қылмыстық жауапқа тартылатындықтары туралы, сондай-ақ кез келген заңға қайшы әрекеттерді хабарлап отырулары үшін кері байланыс бойынша толық ақпараттар алуда», – деді ол.

Back to top button