جاڭالىقتار

مەديتسينالىق ماسكالاردى قىمبات باعاعا ساتقاندار تەرگەلۋدە (ۆيدەو)

قر قارجى مينيسترلىگى قارجى مونيتورينگى كوميتەتىنىڭ ءباسپاسوز  قىزمەتى نۇر-سۇلتان قالاسىندا مەديتسينالىق ماسكالاردى قىمبات باعاعا ساتقان ءبىر توپ ازامات انىقتالعانىن حابارلادى.

«2020 جىلعى 18 ناۋرىزدا قر قم قارجى مونيتورينگى كوميتەتىنىڭ نۇر-سۇلتان قالاسى بويىنشا ەكونوميكالىق تەرگەۋ دەپارتامەنتى پاۆلودار وبلىسى بويىنشا ەكونوميكالىق تەرگەۋ دەپارتامەنتىمەن بىرلەسە وتىرىپ زاڭسىز كاسىپكەرلىك قىزمەت فاكتىسىن انىقتادى. رەسپۋبليكاداعى توتەنشە جاعدايعا وراي ەلوردالىق ءبىر توپ ازامات حالىققا قىمبات باعادا 55 مىڭ دانا مەديتسينالىق ماسكانى ساتۋمەن اينالىسقان. سونداي-اق، ولاردىڭ بۇل ماسكالارعا بەرىلەتىن ارنايى قۇجاتتارى بولماعان. ماسكانى ساتۋدان تۇسكەن پايدانىڭ جالپى سوماسى 12 ملن 500 مىڭ تەڭگەنى قۇرادى. قازىرگى ۋاقىتتا سوتقا دەيىنگى تەرگەۋ امالدارى باستالدى»، – دەلىنگەن مالىمەتتە.

قازاقستاندىقتار بەتپەردەلەردى قىمبات باعاعا ساتۋ فاكتىلەرى تۋرالى سەنىم تەلەفوندارىنا حابارلاي الادى.

«ەگەر مەديتسينالىق ماسكا مەن انتيسەپتيكا قۇرالدارىنىڭ باعاسىن نەگىزسىز كوتەرۋ فاكتىلەرىنىڭ كۋاسى بولساڭىزدار، كەلەسى سەنىم تەلەفوندارى بويىنشا: قر قم قارجى مونيتورينگى كوميتەتى – 8 (7172) 70-84-78, نۇر-سۇلتان قالاسى بويىنشا ەتد – 8 (7172) 31-61-45 حابارلاسۋدى سۇرايمىز»، – دەدى ۆەدومستۆودان.

 

Back to top button