Қазақстанда оралмандардың мәртебесі ұзартылды

Қазақстанда оралмандардың мәртебесі ұзартылды

Қазақстанда оралмандардың мәртебесі ұзартылды
ашық дереккөзі
ҚР Еңбек және халықты әлеуметтік қорғау министрлігі Қазақстанда азаматтық алмаған оралмандарға мәртебесін ұзартуға қатысты түсініктеме берді, деп хабарлайды ҚазАқпарат. «Тәуелсіздік алған сәттен бастап Қазақстан этникалық қазақтардың елге ерікті түрде оралуын ынталандыру саясатын жүргізеді. 1991 жылдан бастап 303 мың отбасы немесе 1 млн 40 мың этникалық қазақ тарихи отанына қоныстанды және оралман мәртебесін алды. Бұл көрсеткіш ел халқының 6 пайызын құрайды. Осының арқасында көші-қонның теріс сальдосының деңгейін төмендетіп, демографиялық өсімге қол жеткізілді. Олардың көпшілігі азаматтықты алып, басқа қазақстандықтармен теңдей еліміздің әлеуметтік-экономикалық дамуына қомақты үлес қосып келеді. Қазақстанда этникалық репатрианттардың бейімделуі мен интеграциялау күшін барынша қолайлы жағдайлар жасалған. Осылайша, оралман мәртебесін алғандарға Қазақстан Республикасының азаматтығын жеңілдетілген тәртіппен алуға құқығы бар (қалған шетелдіктер Қазақстанда кемінде 5 жыл тұруы қажет)», - делінген министрлік хабарламасында. Сонымен қатар, оралман мәртебесі оны алған күннен бастап бір жыл өткен соң тоқтатылады. Оралман мәртебесін ұзарту оралман мәртебесі тоқтатылған күннен бастап үш айдан аспайтын мерзімге өтініш берген кезде жеңілдетілген тәртіппен азаматтық алу мақсаттары үшін ғана көзделеді. «Бүгінгі таңда қарастырылған уақыт ішінде жеңілдетілген тәртіппен қазақстандық азаматтығын алмаған оралмандар қандай жағдайдың туындауы себептеріне қарамастан, мұндай мүмкіндіктен айырылады. ҚР Еңбек және халықты әлеуметтік қорғау министрлігіне осы мәселені шешуге көмек көрсету бойынша көптеген өтініштер келіп түсуде. Осыған байланысты, ағымдағы жылдың 16 наурызында Қазақстан Республикасының Президенті - Елбасы Нұрсұлтан Назарбаев азаматтықты жеңілдетілген тәртіппен алу үшін оралмандар мәртебесін 2019 жылдың 31 желтоқсанына дейін ұзарту туралы шешім қабылдады. Осылайша, мәртебесі аяқталған оралмандар оны ұзарту үшін жергілікті атқарушы органдарға және қазақстандық азаматтығын жеңілдетілген тәртіппен алу үшін ішкі істер органдарына жүгіне алады», - деп атап өтілген ведомство мәліметінде.