جاڭالىقتار

«بەسەۋدىڭ حاتى» نەمەسە لەكەروۆ نەدەن جازىقتى بولدى؟

 «…ونىڭ ءسوزى پارتياعا قارسى لەكەروۆتىك-ۇلتشىلدىق نۇسقاۋمەن ۇندەس جانە ءبىزدىڭ قۇجاتتا باياندالعان ماسەلەلەردەن تىپتەن دە الشاق جاتىر»، – دەپ ودان نەگە ات-توندارىن الا قاشتى؟ 

«بك(ب)پ ولكەلىك كوميتەتىنە، 
گولوششەكين جولداسقا.

ولكەلىك كوميتەت بيۋروسى قاپەرىنە مىنا تومەندەگىلەردى جەتكىزۋدى سىزدەن وتىنەمىن.
اعىمداعى جىلدىڭ 4 شىلدە كۇنى وتكەن بيۋرودان كەيىن بىرقاتار جولداستاردىڭ سويلەگەن سوزدەرىنەن سوڭ جانە ءوزىمنىڭ جەكەلەگەن باسشى جولداستارمەن پىكىر الىسقاننان كەيىن، سونداي-اق ولكەلىك كوميتەتتىڭ سوڭعى قۇجاتىمەن (قاۋلىسىمەن) تانىسقاننان كەيىن، مەن ءبىر شەشىمگە كەلدىم. مەن پارتيا جولىنا ەمەس، ماحروۆو-وپپورۋنيستىك جولعا تۇسكەن ەكەنمىن. مەن وپپورتۋنيستەردىڭ ۇيىعىنا باتىپپىن. ولكەلىك كوميتەتتىڭ لەنيندىك باعىتىن (بارلىق ماسەلەلەر بويىنشا) تەكسەرۋ جولىنا ءتۇسىپ، ولكەلىك كوميتەت باسشىلارىنا ورىنسىز شابۋىلداپ، تەك «جولعا ءتۇستى ەمەس-اۋ» تەكسەرۋمەن تىكەلەي اينالىسا وتىرىپ، باسشىلىققا ءجون-جوسىقسىز ءتيىسىپپىن. 
مەنىڭ قاتەلىگىم – ءبىزدىڭ جەتىستىكتەرىمىزدى باعالاماي، كەمشى­لىكتەرىمىزدى اسىرا كورسەتۋ جانە قيىنشىلىقتار الدىندا داۋ-داقپىرتقا ۇرىنعان ءوزىمنىڭ سوزدەرىمنەن-اق كورىنىس بەرۋىندە.
…مەنىڭ بارلىق قاتەلىگىم – ولكەلىك كوميتەت بيۋروسىندا ءبىزدىڭ ەلدەگى جاعدايدى جەتە تۇسىنبەۋشىلىگىمىزدەن بولدى دەپ اقتالعانىمىزبەن، پارتيا ۇيىمىنان جاسىرىن ۇستاۋ ارەكەتىمىزدەن جانە ءبىزدىڭ ولكەلىك كوميتەتكە تيتتەي دە شىندىقتى جازباعان مالىمدەمەمىزدەن جانە تاعى باسقا دا جايلاردىڭ قاباتتاسا جۇرۋىنەن بولدى.
جوق، ءبىز ءبارىن دە انىق تۇسىندىك. بىراق پارتيالىق تۇرعىدان ەمەس. مەنىڭ بارلىق ايتقاندارىم، جۇرت الدىندا سويلەگەن سوزدەرىم جانە جازعان قۇجاتىمىز تاپ جاۋلارىنا قارسى كۇرەسىپ، بارلىق قيىنشىلىقتاردى جەڭىپ شىعۋدا ەمەس، پارتيا مەن پارتيانىڭ جەكەلەگەن مۇشەلەرىن، جۇمىسشىلار مەن كولحوزشىلاردى السىزدەندىرىپ، باي مەن كۋلاكتاردى جانە ۇلتشىلداردى قارۋلاندىرعان ماحروۆو-وپپورتۋنيستىك تۇرعىدا بولعانىن ءتۇسىندىم. مەن جۇرتتى جۇمىلدىرۋمەن ەمەس، تاراتۋمەن اينالىسىپپىن.
ءوز قاتەمدى باسقادان ەمەس، ماعان اۋىلداعى كەمشىلىكتەر تۋرالى كوپىرمە كوپ سوزدەر ارقىلى كەلگەن كۋلاك-ۇلتشىلدىق يدەولوگيانىڭ ىقپالىمەن، ۇلتشىل ەلەمەنتتەرمەن (لەكەروۆ) جاقىنداسىپ، دوستىق بايلانىستا بولۋىم ارقىلى جانە جەكەلەگەن فاكتىلەرگە سىن تۇرعىسىنان قاراماۋ ارقىلى جەتكەنىنەن كورەمىن. مەنىڭ وسى قاتەلىگىمدى تۇسىنۋگە كومەكتەسكەن ولكەلىك كوميتەت ونى تۇزەتۋگە دە كومەكتەسەدى دەپ سەنىم ارتامىن. 
مەن قول قويعان حاتتاعى جىبەرگەن قاتەلىكتەرىمدى ءىس جۇزىندە بار كۇش-جىگەرىمدى سالىپ تۇزەتۋگە تىرىسامىن.
قۋانىشەۆ
12.VII. 32 جىل».
قازاق اكسر مەملەكەتتىك جوسپارلاۋ كوميتەتى پرەزيديۋمىنىڭ مۇشەسى جانە ەنەرگەتيكا سەكتورىنىڭ مەڭگەرۋشىسى قادىر قۋانىشەۆ تەكە ساقال گولوششەكيننىڭ الدىندا وسىلاي ەتبەتتەي جاتىپ، اقتالادى دەپ كىم ويلاعان؟ داۋلەتعاليەۆ، مۇسىرەپوۆ، التىنبەكوۆتىڭ ونىمەن كەلىسپەۋىنىڭ ءمانى دە وسىندا جاتسا كەرەك. قۋانىشەۆتىڭ مويىنداۋى وزدەرىنە دە قاتىستى بولعان سوڭ گولوششەكيننىڭ الدىندا جاعدايلارىنىڭ تىم قيىنداپ كەتەرى كادىك. قۋانىشەۆ شىبىن جانىم قايتسەم امان قالادى دەپ بارلىق كىناسىنە ءازىمباي لەكەروۆتى جازعىرىپتى. ونى ۇلتشىل-ەلەمەنتتەر قاتارىنا جاتقىزىپ، گولوششەكيننىڭ جەبەلى ساداعىن وزىنەن سوعان قاراي بۇرسا نە شارا. تەك ءبىر قۋانىشەۆ بولسا ماقۇل-اۋ، باسقالارى دا حاتقا قويىلعان قولى جوق لەكەروۆتى سۇق ساۋساقتارىمەن كورسەتىپ، وعان قارا بوياۋدى باتتاستىرا جاققاندارى قانداي ادامي قاسيەتكە جاتادى؟ باتىرعا دا جان كەرەك. باۋ­ىزدالىپ جاتقاندا قوي ەكەش قوي دا تۇياق سەرپيدى ەمەس پە. ول نەگە ءۇنسىز قالسىن.

«بك(ب)پ ولكەلىك كوميتەتتىڭ بيۋروسىنا،
بك(ب)پ مۇشەسى لەكەروۆ ءا.
مالىمدەمە 
توپتىڭ بەلگىلى قۇجاتى جونىندە ولكەلىك كوميتەت اتىنا مىنانى مالىمدەيمىن.
قۇجات ماعان بەلگىسىز جانە ونى قۇراس­تىرعاندا قاتىسىم بولعان جوق. اۆتورلاردىڭ ولكەلىك كوميتەت سەكرەتاريا­تىندا اۋىزشا سويلەگەن سوزدەرىنەن مەن مىنانداي اسەردى باستان كەشتىم. 1. ءسوز جوق قۇجات تۇعىرنامالىق مانگە يە. 2. قازاقستاننىڭ قازىرگى جاعدايى جانە بولاشاعى بىرجاقتى كۇڭگىرت تۇسپەن كورسەتىلگەندىكتەن، كوزگە ادامدى تورىق­تىراتىن كوڭىلسىزدىك كورىنىستەرىن اكەلەدى. ءيا، وسى ەكى جاعدايدى دا ايىپتاۋعا بولادى. قۇجاتپەن جەتە تانىس ەمەستىگىم مەنى كوتەرگەن ماسەلە بويىنشا جان-جاقتى قامتي سويلەۋ مۇمكىندىگىمنەن ايىرىپ وتىر. ەگەر ولكەلىك كوميتەت قاجەت دەپ تاپسا، مەن كەز كەلگەن ۋاقىتتا مۇنى جاساۋعا دايىنمىن.
مەن سەكرەتاريات ماجىلىسىندە قۇجاتتىڭ اۋىل جاعدايى ايتىلعان بولىگىنە قاتىستى سويلەدىم. سول سەكرەتارياتتان كەيىن ءول­كەلىك كوميتەت تاراپىنان ماعان اۋىلداعى ولقىلىقتاردى تۇزەتۋدە بارلىق مۇمكىندىگى بولعان شارالاردى جانە قايتا كوشىپ كەلگەندەردى ورنالاستىرۋدى بۇدان بۇرىن قولعا العاندارىن جەتكىزدى. وسىدان كەيىن مەن بۇل ماسەلە قارالىپ ءبىتتى دەپ ساناعانمىن.
باسشىلىق قۇرامداعى جەكەلەگەن جولداستارعا ايتقان سىنىم ءسوزسىز قاتەلىك بولعان ەكەن. مەن ولاردى جەكە-جەكە سىنعا السام دا، الايدا سول سىندارىم اقيقاتىندا قوعامدىق ساياسي سيپات الىپ كەتەدى دەپ ويلاعانىم جوق. ءيا، بۇل فاكتى دە ايىپتالۋعا لايىقتى.
بۇل ىستە مەنىڭ جەكە ۇيىم­داستىرۋشىلىق ءرولىم بولعانىن مۇلدەم جوققا شىعارامىن. سولاي بولا تۇرا مەن اۋىلداعى قيىن جاعدايعا بايلانىستى حاتقا قول قويعان جولداستارمەن جەكەلەي سويلەسۋ كەزىندە اۋىلدىڭ مۇشكىل جاعدايىن وتكىر سەزىنىپ، سوعان بايلانىستى نارازىلىعىمدى ايتتىم. بۇل جونىندە ۇزاق ويلانۋدان كەيىن مەن ولارعا ىقپال ەتىپ وسى جولعا سالىپ جىبەردىم بە دەگەن تۇجىرىمعا دا كەلدىم. مەن بۇل كىنامدى تولىق ءوز مويىنىما الامىن.
وسى فاكتىلەردىڭ ءبارى جيىلىپ كەلىپ، مەنىڭ اۋىلداعى ورىن العان جاعدايدى بولشەۆيكتەرشە سەزىنە الماعانىمدى كورسەتەدى. ءسوز جوق، بۇلاردىڭ بارىنە مەنىڭ وتكەندەگىلەرىمنىڭ اسەرى بولدى. وسىلارعا بايلانىستى ءوزىمنىڭ وتكەنىمدى جانە مىنەز-قۇلقىمدى كىنالاي وتىرىپ، الداعى ۋاقىتتا دۇرىس جولعا تۇسەمىن دەپ ۋادە بەرەمىن.
لەكەروۆ
14. VII. 32 جىل».
لەكەروۆتىڭ قۇجات قۇرىلىمىنا قاتى­­­سىم جوق دەپ وتىرعانى وعان قول قويۋشى­لارمەن الدىن الا كەلىسىمدەرىنەن تۋىنداپ وتىرعانى انىق. سول كەلىسىم بويىنشا داۋلەتعاليەۆ، مۇسىرەپوۆ، گاتاۋل­لين، التىنبەكوۆ، قۋانىشەۆ قانداي جاعدايدا دا ءازىمباي لەكەروۆ تۋرالى اۋىز اشپاۋعا شارت جاساسقان. سوندىقتان دا لەكەروۆ بەسەۋىنە ەش ءشۇباسىز سەنىم ارتىپ، مالىمدەمەسىن سول كەلىسىمدى ۇستانا وتىرىپ جازعانى انىق. ول سەكرەتارياتتا ماسەلەنىڭ اۋىل شارۋاشىلىعىنا قاتىستى ءسوز ايتتىم دەيدى. سوعان قاراعاندا ولكەلىك گازەتتەرگە جاريالاعان ماقالالارىنداعى ءوزارا سىن ۇردىسىمەن ولكەلىك كوميتەت جۇمىسىنا ايتقان سىندى قايتالاعانى كامىل. لەكەروۆ جەكەلەگەن باسشىلاردى ءاجۋالاپ سىناعانىنان دا باس تارتقان جوق. مويىنداي وتىرىپ، ونىڭ قوعامدىق سيپات الىپ كەتكەنىن جاسىرمادى. ەڭ باستىسى ول مالىمدەمەسىندە ولكەلىك كوميتەتكە جىبەرىلگەن حاتقا قول قويعان بەسەۋدىڭ ءوزىن «ۇلتشىل» ەتىپ كورسەتىپ، قۇرباندىققا شالىپ جىبەرسە دە، سولاردىڭ ءبىرىنىڭ اتىن اتاپ، كىنا ارتپاعان. ءوزىن عانا كىنالاۋمەن شەكتەلگەنى مالىمدەمەسىنەن تايعا تاڭبا باسقانداي كورىنىپ تۇر. ادامنىڭ ادامي قاسيەتى باسىنا ءىس تۇسكەندە، تاعداردىڭ قيىن كەزەڭدەرىندە تانىلادى. وسى تۇرعىدان كەلگەندە بەسەۋ كىم، لەكەروۆ كىم دەگەن ويعا باتاسىڭ.
ديكتاتور فيليپپ گولوششەكيننىڭ قۋلىق-سۇمدىعىنا قۇرىق بويلامايتىن ناعىز اككىنىڭ ءوزى ەكەنى جىمىن بىلدىرمەيتىن ىسىنەن كورىنىس بەرىپ جاتتى. قازاقستاندى باسقارعان التى جىلدىڭ ىشىندە ۇلتتىڭ ءسوز ۇستار تالاي مارعاسقالارىن «ۇلتشىل» اتاپ، رەس­پۋبليكادان شەتتەتىپ جىبەردى. ارقالاي ايلاكەرلىك تاسىلمەن بىرىنە ءبىرىن ايداپ تا سالدى. نۇرماقوۆ، قوجانوۆ، سادۋاقاسوۆ سەكىلدى بىلىكتى باسشىلاردان سولاي قۇتىلدى. ول 1932 جىلدىڭ 4 شىلدەسىندە وتكەن ولكەلىك پارتيا كوميتەتىنىڭ بيۋروسىندا بەسەۋدىڭ حاتىن تالقىعا سالىپ، سوعان بايلانىستى بەسەۋگە لەكەروۆتى قوسا كىنالاپ، مويىنداتىپ قانا قويعان جوق. سونداي-اق، ولاردىڭ لەكەروۆكە جالا جاپقان مالىمدەمەلەرىن الىپ قالۋمەن شەكتەلمەي، ەندى قايتىپ باس­تارىن كوتەرتپەيتىندەي ەتۋدى جانە تاعى بىرەۋلەر وسىنداي حاتتى ءستاليننىڭ اتىنا جازىپ جىبەرە مە دەگەن كۇدىكپەن باسقالارعا ساباق ەتۋدى ويلاستىرعان. گولوششەكين ولاردى 1932 جىلدىڭ 15 شىلدەسىندە ولكەلىك پارتيا كوميتەتى مەن تەكسەرۋ كوميسسياسىنىڭ بىرىككەن ماجىلىسىندە تالقىعا سالدى.
مىنبەرگە كوتەرىلگەن گولوششەكين قولىنداعى بەسەۋدىڭ حاتىن پاراقتاپ تۇرىپ: «…حات يەلەرى مەنىڭ وسىدان ەكى جىل بۇرىن قازاقستاندا 40 ميلليون مال باسى بار بولعانىن العا تارتىپ، قازىر سول مال اشتان قىرىلىپ، بار-جوعى 8 ميلليونى عانا قالعانىن كورسەتىپتى، – دەپ حاتتىڭ جەكە-جەكە بولىكتەرىنە توقتالىپ، سوڭعى جاعىنا كوز جۇگىرتتى. – قازاق اۋداندارىندا كورىنىس العان اشارشىلىق پەن ادام ءولىمى، مال باسىنىڭ جاپپاي قىرىلۋى ءۇنسىز قالىپ وتىر. بۇل كۇردەلى ماسەلە پارتيا بەلسەندىلەرىندە كەڭ تالقىلانىپ، بيۋرودا جانە ولكەلىك كوميتەتتىڭ IV پلەنۋمىندا قارالۋى ءتيىس». – ول زالدا وتىرعانداردى شولا قاراپ، اعىمداعى جىلدىڭ وندىرىستەگى تابىستارىن، اۋىل شارۋاشىلىعىن كوللەكتيۆتەندىرۋدەگى جەتىستىكتەرىن تىلگە تيەك ەتىپ، قاتقىل ۇنمەن حاتقا قول قويعانداردى ءبىراز تۇقىرتىپ الدى. 
مىنبەردەن التىنبەكوۆ ولكەلىك كوميتەتكە جازعان مالىمدەمەسىن قايتالاپ شىقتى. سودان كەيىن ءسوز العاندار داۋلەتعاليەۆ، قۋانىشەۆ، مۇسىرەپوۆ بۇرىنعى جازعان مالىمەتتەرىن قايتالاپ، قاتەلىكتەرىن مويىنداپ، بارىنە لەكەروۆتى كىنالى ەتىپ، وزدەرىن پارتيا مۇشەلىگىنەن شىعارماۋدى ءوتىندى. 
ءسوز كەزەگىندە ءازىمباي لەكەروۆ: «ءبىز مەملەكەتتىك كوميتەتتە ەكىنشى بەس­جىلدىقتىڭ جوسپارىنا كىرىسەردە، وتكەن بەسجىلدىقتىڭ قورتىندىسىن جاسادىق. ءيا، ونەركاسىپ جاعىنان كورسەتكىشتەر جامان ەمەس. ال اۋىل شارۋاشىلىعىندا العا قويىلعان مىندەتتەر ورىندالماعان. حالىق سانى مەن مال باسى كۇرت ازايعان. اۋىلداردىڭ اشتىقتان ولمەگەندەرى كورشىلەس رەسپۋبليكالارعا، قىتايعا جەر اۋىپ كەتكەن. وسىنىڭ ءبارى ولكەلىك كوميتەتتەگى باسشىلاردىڭ ورتالىق كوميتەتتىڭ شەشىمدەرىن ورىنداۋ بارىسىندا جىبەرگەن قاتەلىكتەرى دەپ ويلايمىن. 
مەن حاتتىڭ اۋىل شارۋاشىلىعى جونىندە جازىلعان بولىگىن تولىق قۇپتايمىن. ەگەر اۋىلدىڭ جاعدايىن تەز ارادا تۇزەمەسەك، اۋىلدا تۇرىپ جاتقان قازاقتاردى اشتىقتان جاپپاي قىرىپ الارىمىز حاق. قازاقتاردىڭ تىرشىلىك كوزى مال. سول مالىن تاركىلەگەن سوڭ اشتىققا ۇرىنىپ جاتىر. اۋىل شارۋاشىلىعىنا كەلگەندە ولكەلىك كوميتەتتىڭ ۇستانعان باعىتى مەن ساياساتى دۇرىس بولمادى. بۇل تۋرالى مەن بۇرىن دا ايتقانمىن. رەسپۋبليكادا ەشقانداي دا «كىشى وكتيابردى» جۇرگىزۋدىڭ قاجەتى جوق ەدى. ويتكەنى قازاق جەرىندە كاپيتاليزم ورناماعان، سوتسياليزمگە فەودالدىق قوعامنان ءبىر-اق ءوتتى. سوندىقتان مەشەۋ ەلدىڭ دامىماعان تاپتارىمەن قانداي دا ءبىر رەۆوليۋتسيالىق كۇرەستى جۇرگىزۋدىڭ قاجەتى جوق بولاتىن. حالىقتى ەكى تاپقا ءبولىپ، ءبىرىنىڭ سوڭىنا ءبىرىن سالىپ، قويعاننان ەشكىم دە ۇتقان جوق. ۇتىلعان تەك سوتسياليزم قۇرىلىسى عانا.
مەنىڭشە، باسشىلار دۇرىس شەشىم قابىلداۋ ءۇشىن، فيليپپ يساەۆيچ، اۋەلى ءسىز باستاپ، وبلىستارعا شىعىپ، اۋدانداردى ارالاپ، حالىقتىڭ كۇيزەلگەن جاعدايىن ءوز كوزىڭىزبەن كورگەنىڭىزدە، قازاق حالقىنىڭ ۇلتتىق ەرەكشەلىگىمەن تانىسقانىڭىزدا رەسپۋبليكا مۇنداي اۋىر جاعدايعا ۇشىراماعان بولار ەدى. وكىنىشكە قاراي ولاي بولمادى». 
لەكەروۆ ەندى شەگىنەرگە جەر جوق ەكەنىن بىلگەن ءتارىزدى. اۋىل شارۋاشىلىعىنداعى قيىن جاعدايدى، جاپپاي اشتىقتى وسى بيۋرودا شىنداپ قوزعاماسا، ماسەلە ەش قوزعالىسسىز قالا بەرەتىنىن، ىشتەي ءبىلىپ، گولوششەكيننىڭ جاساماق بولعان «كىشى وكتيابرى» قازاققا اشتىقتىڭ قاسىرەتىن اكەلگەن قاتەلىگىن بەتىنە باسىپ، ءوز ويىن باتىل، ءارى اشىق ايتقانى كورىنىپ تۇر. 
گولوششەكين: «ۆلاديمير يليچ قازاق­ستانعا كەلمەي-اق نەمەسە گرۋزياعا بارماي-اق وكتيابر رەۆوليۋتسياسىن باسقارىپ، ىسكە اسىردى. بۇرىنعى پاتشالىق رەسەيدىڭ قاي جەرىندە بولماسىن سوتسياليزم جەڭدى». 
گولوششەكيننىڭ لەنيننەن ۇلگى العان ءتۇرى. كابينەتتەن شىقپاي-اق بۇراتانا حالىقتى وڭاي باسقارۋعا بولادى دەپ ويلاسا كەرەك. 
لەكەروۆ: «فيليپپ يساەۆيچ، وكتيابر رەۆوليۋتسياسى مەن ناقتىلى ءسوتسياليزمدى تەڭەۋگە بولمايدى. انا جاقتا قوعام كاپيتاليزمنەن سوتسياليزمگە اۋىستى. جۇمىسشى مەن شارۋانىڭ ديكتاتۋراسى ورنادى. بۇل ۇلكەن ساياسات. ال مۇندا باسقا ەكونوميكا: اش-جالاڭاش حالىقتى جۇمىسپەن قامتاماسىز ەتىپ، تاماقتاندىرۋ قاجەت».
رەسەي كاپيتاليزم ساتىسىندا ءبىراز وركەنيەتكە جەتتى. لەكەروۆ ولاردى ءالى دە فەوداليزم ساتىسىندا ءومىر ءسۇرىپ جاتقان حالىقپەن سالىستىرۋعا بولمايتىنىن، مۇنداعى سوتسياليزم ورناتۋدىڭ ءجونى مۇلدەم بولەك ەكەنىن ەسكەرتىپ، قاتەلىك حالىقتى اشتىققا ۇرىندىرعانىن، ەندى سولاردى امان الىپ قالۋ جاعىن العا تارتقان. 
ولكەلىك پارتيا كوميتەتىنىڭ ەكىنشى حاتشىسى قۇرامىسوۆ: «ءبىز ولكەلىك پارتيا كوميتەتىنىڭ باسشىلىعىمەن ءبىرىنشى بەسجىلدىقتى اياقتادىق. جەتكەن جەتىستىكتەرىمىز از ەمەس. ءبىر عانا تۇركسىبتىڭ ءوزى نەگە تۇرادى. بەس جىلدىق جوسپار ءۇش جىلدا اياقتالدى. وسىنىڭ وزىمەن ولكەلىك كوميتەت حالىقتى كۇردەلى قۇرىلىسقا ۇيىمداستىرا الاتىنىن كورسەتىپ بەردى. …قۇرىلىسشىلار اعاشتان سوعىلعان باراكتاردا، جەردەن قازىلعان كۇركەلەردە تۇرىپ-اق كوپىرلەردى سالعاندا قاجەتتى تاس­تاردى ونداعان، جۇزدەگەن شاقىرىمداردان اربامەن تاسىدى. ناتيجەسىندە مىڭداعان ادام جۇمىسقا تارتىلدى. وڭتۇستىك پەن سولتۇستىكتەن تارتىلعان تەمىرجول جەلىلەرى اينابۇلاقتا ءتۇيىسىپ، التىن قازىق قاعىلعان كەزدەگى حالىقتىڭ قۋانىشىندا شەك بولعان جوق. جۇزدەگەن ۇيلەر، بەكەتتەر مەن دەپولار سالىنىپ، قانشاما ادام جۇمىسپەن قامتاماسىز ەتىلدى. مىنە، ولكەلىك كوميتەتتىڭ جۇمىسى! مۇنداي مىسالداردى لەكەروۆ جولداس كورگەن جوق. وكىنىشكە قاراي رەسپۋبليكادا بولىپ جاتقان وسىنداي يگى شارالاردى كورىپ تۇرىپ، مۇسىرەپوۆ جولداستىڭ قالاي لەكەروۆتىڭ ۇگىتىنە كونىپ كەتكەنىنە تاڭىم بار. فيليپپ يساەۆيچ جولداس قازاقستانعا كەلەگەن بويدا-اق وكتيابر رەۆوليۋتسياسىنىڭ بولماعانىن ايتقان ەدى. ونىڭ بۇل پىكىرىمەن پارتيانىڭ ورتالىق كوميتەتى دە كەلىسىپ قولداعان. مۇندا تاپتىق كۇرەس ءجۇرۋ كەرەك بولاتىن. ونى ۇيىمداستىردىق. ويتكەنى جاڭا قوعام ورناتۋ ءۇشىن بۇرىنعى قوعام قاجەتسىز ەلەمەنتتەردەن تازارتىلىپ، قايتادان جاڭارتىلۋى كەرەك. ءسوتسياليزمدى ورناتۋ ءۇشىن تازا جۇمىسشى مەن شارۋادان تۇراتىن قوعام كەرەك. ال اشتىققا ۇرىنعاندار – كوشىپ كەتكەن جالقاۋلار. جۇمىس ىستەيمىز دەسە كولحوزدارعا كىرىپ، ەڭبەك ەتىپ، تاماقتارىن تاۋىپ جەسىن. مىسالى، قاراعاندى، تۇركسىبتە جۇمىس ىستەيمىن دەگەندەرگە جۇمىس تابىلادى. لەكەروۆ مۇنى بىلمەگەن، بىلسە دە بىلۋگە قۇشتارلىق تانىتپاعان. ۇكىمەت باسشىلارىنىڭ ءبىرى بولا ءجۇرىپ، ولكەلىك كوميتەتتىڭ اتقارعان جۇمىسىن جوققا شىعارعانى ءۇشىن مەن وعان «قاتاڭ سوگىس» جاريالاۋدى ۇسىنامىن. ءازىمباي لەكەروۆ بۇعان دەيىن ۋەزدەردى، گۋبەرنيالاردى باسقاردى. اۋىل شارۋاشىلىعىن جاقسى بىلەدى. ونەركاسىپتەن دە حابارى بار. ويتكەنى ول قازاقستان حالىق شارۋاشىلىعى كەڭەسىنىڭ توراعاسى قىزمەتىن اتقارعان، حالىق كوميسسارلار لاۋازىمىندا دا بولىپ، حالىق كوميسسارلار كەڭەسىنىڭ مۇشەسى بولدى. لەكەروۆ پەداگوگيكالىق ينستيتۋتتا كافەدرا مەڭگەرۋشىسى، پروفەسسور. سوندىقتان حاتتىڭ اۆتورى تەك لەكەروۆ. قازاقستان ەكونوميكاسىن لەكەروۆتەن ارتىق بىلەتىن مۇندا جان جوق. تاعى قايتالاپ ايتامىن، حاتتىڭ اۆتورى تەك لەكەروۆ. ال داۋلەتعاليەۆ پەن التىنبەكوۆ كوممۋنيستىك ينستيتۋتتا ىستەيدى. سونداي-اق عاتاۋللين مەن مۇسىرەپوۆ قازاق مەملەكەتتىك باسپاسىنىڭ قىزمەتكەرلەرى. قۋانىشەۆ جوسپارلاۋ كوميتەتىندە ەنەرگەتيكالىق سەكتور مەڭگەرۋشىسى عانا. سىزدەر قالاي ويلايسىزدار، وسىلاردىڭ ىشىنەن ەكونوميكانى كىم جەتىك بىلەدى؟ لەكەروۆتەن باسقا ەشكىم دە. سوندىقتان مەن بۇل حاتتىڭ اۆتورى تەك لەكەروۆ قانا دەپ قايتالاپ ايتامىن. بۇلاردىڭ ءبىر قاتەلىگى العاشقى كەلىسكەن سوزدەرىندە تۇرا الماعاندارى دەر ەدىم. مىنە، حاتقا قول قويعان بەسەۋ مەنىڭ اتىما جازىلعان وسى حات سوڭىندا «ءبىزدىڭ حاتىمىزدى ورتا پارتيا اكتيۆى اتىنان قابىلداپ، «جوعارى لاۋازىمدى» ادامداردىڭ بۇعان ەشقانداي قاتىسى جوق دەپ بىلىڭىزدەر» دەگەن. بۇدان نەنى اڭعارۋعا بولادى؟ ولاردىڭ «جوعارى لاۋازىم» دەپ وتىرعاندارى – لەكەروۆ. ولاردىڭ سونى قورعاعان ءتۇرى بۇل. ال حاتقا لەكەروۆتىڭ قاتىسى بار ەكەنىن وزدەرى دە ايتتى. تەك لەكەروۆ قانا ولارمەن العاشقى كەلىسكەن شارتىن ۇستانىپ، وسى كەزگە دەيىن ءتان الماي تۇر. ول وسى بيۋرودا دا ءوز قاتەسىن مويىنداعىسى جوق».
گولوشەكين كادرلار تاڭداۋدا قاتە­لەسپەگەن. وزىنە قارسىلاستارىن، اقىل-پاراساتى مەن ءبىلىم-بىلىكتىلىگى جوعارى حالىقتىق ءسوز ۇستار ازاماتتاردى قىزمەتتەن ىعىستىرىپ، ايتقانىن ەكى ەتپەي ورىندايتىن قۇرامىسوۆتاي جاندايشاپتاردى ماڭايىنا جيناي بىلگەن. ءيا، لەكەروۆ جاس بولسا دا باسشىلىقتىڭ بىرنەشە ساتىسىنان وتكەن، ابدەن ىسىلعان ازامات. سوندىقتان دا ول ەل ءىشى جاعدايىن قۇرامىسوۆ ايتقانداي بىلمەيدى ەمەس، وتە جاقسى بىلەدى. ال قۇرامىسوۆتىڭ ءوز مىندەتىن بىلمەيتىنى «…اشتىققا ۇرىنعاندار، كوشىپ كەتكەندە – جالقاۋلار» دەگەن ورەسكەل ساندىراعىنان ورەسىنىڭ سونشالىق تومەندىگى وسى سوزدەرىنەن بايقالادى. الايدا ونىڭ «…بۇلاردىڭ ءبىر قاتەلىگى العاشقى كەلىسكەن سوزدەرىندە تۇرا المادى» دەگەنى دۇرىس. حاتقا قول قويعان بەسەۋى بىرىگىپ، ءبىر اۋىزدان گولوششەكينگە قارسى تۇرعاندا ۇلكەن كۇش ەدى.
گولوششەكين: «حاتقا قول قويعاندار اراسىنان تاعى كىمدى جازا الادى دەسەك، ول مۇسىرەپوۆ. الايدا ول قازاق مەملەكەتتىك ادەبيەت باسپاسىندا باس رەداكتور. جازۋشى، وسى ۋاقىتقا دەيىن كوممۋنيستىك يدەولوگيادان اۋىتقىماعان. مۇسىرەپوۆتىڭ رەسپۋبليكا ەكونوميكاسىمەن اينالىساتىن ۋاقىتى جوق. باس رەداكتوردىڭ جۇمىسى باسىنان اسىپ جاتىر».
ارينە، كىناسىن بىردەن مويىنداپ، ىعىنا قاراي جىعىلىپ جاتسا، گولوششەكين وعان نەگە قاتتى كەلسىن. حالىقتىق جازۋشى حالىق قامىن ويلاپ، لەكەروۆكە كىنا ارتپاي، سونىڭ جاعىندا بولعاندا عوي شىركىن دەيمىز-اۋ ءبىز. ءۇمىت اقتالماسا امال قانشا. 
كوميسسيا مۇشەسىنىڭ ءبىرى: «حات جازۋشىلار ولكەلىك كوميتەتتىڭ العا قويعان باعىتىمەن ءجوندى تانىس ەمەس. ال سوتسياليزم ورناتۋ ءۇشىن ماركستىك-لەنيندىك تەوريانى جاقسى مەڭگەرىپ، ءىس جۇزىندە پايدالانا ءبىلۋ كەرەك. وسى جاعىنان كەلسەك، حاتقا قول قويعاندار دا، لەكەروۆ تە ءالى جەتىلە قويماعان. ەگەر سونى يگەرسە، مۇنداي جولعا تۇسپەس ەدى. قالاي ايتقاندا دا وسى توپتىڭ ۇيىمداستىرۋشىسى لەكەروۆ ەكەنى انىق. ويتكەنى حاتتا كورسەتىلگەن تسيفرلار قۇپيا، ونى قاراپايىم ادام بىلمەيدى. تەك كوممۋنيست لەكەروۆ قانا بىلەدى. سوندىقتان مەن لەكەروۆتى پارتيا قاتارىنان شىعارۋدى ۇسىنامىن».
ءازىمباي لەكەروۆ ماركستىك-لەنيندىك تەوريانى مەڭگەرمەك تۇگىلى سولاردىڭ شىعارمالارىن قازاق تىلىنە اۋدارۋشىلاردىڭ ءبىرى. ماركستىڭ «كاپيتالىن» نەمىس تىلىندە وقىپ، نۇرماقوۆ پەن رىسقۇلوۆقا ونىڭ ورىس تىلىندەگى اۋدارماسىنىڭ اۋىتقىپ كەتكەن جەرلەرىن ەسكەرتىپ، تۇزەتۋلەر ەنگىزگەن. بەسەۋدىڭ حاتىنداعى قۇپيا تسيفرلاردى بەرگەن لەكەروۆ جانە ۇيىمداستىرۋشى دا سول دەۋىنىڭ قيسىنى بار.
ولكەلىك كوميتەتتىڭ ءبىر مۇشەسى: «ءبىز كوممۋنيستەردىڭ ءىسىن قاراساق بولدى ىلعي دا وعان كۇيە جاققىمىز كەلەدى دە تۇرادى. مىنە، ەندى ءبارىمىز لەكەروۆتى جىعىپ ساپ، تۇرماستاي ەتىپ سوققىعا الىپ جاتىرمىز. سويلەگەندەردىڭ ءبارى دە لەكەروۆتى كىنالاپ، باسقالارىن اقتاپ الۋعا تىرىسۋدا. ولار بالا ەمەس قوي. رەسپۋبليكاداعى جاعدايدى ءار جەردەن وقىپ، ەستىپ جاتىر ەمەس پە. ءيا، لەكەروۆ ەكونوميكا سالاسىندا رەسپۋبليكاداعى جاعدايدىڭ ءبارىن بىلەدى. سوندىقتان حاتقا قول قويعانداردىڭ بارىنە دە سىن تۇرعىسىنان باعا بەرگەن ءجون. پارتيا تاراپىنان سوگىس العانداردى قىزمەتتەن تومەندەتىپ، جۇمىستان بوساتىپ، ءىسىن سوتقا بەرۋ دە بار. لەكەروۆ رەسپۋبليكاعا بەلگىلى تالانتتى مامان، ءوز ىسىنە جەتىك ءارى ادال ىستەيتىن جان. مىنە، مەنىڭ قولىمدا لەكەروۆتىڭ «ەكونوميچەسكايا جيزن» گازەتىندەگى «بۋرجۋازنىە يدەي نا سترانيتساح پلانوۆوگو جۋرنالا» دەگەن ماقالاسى بار. ماقالا اعىمداعى جىلدىڭ ون ەكىنشى اقپانىندا جارىق كورگەن. سودان بەرى وتكەن ءۇش-ءتورت اي بەدەرىندە لەكەروۆتىڭ پارتياعا دەگەن كوزقاراسى مۇلدەم وزگەرە قالعان جوق شىعار. بۇل ماقالاسىندا ول قازاقستاننىڭ سوتسياليستىك اگرارلىق-يندۋستريالىق رەسپۋبليكاعا اينالىپ كەلە جاتقانىن، ونىڭ كسرو-نىڭ ءتۇستى مەتاللۋرگيا، كومىر ونەركاسىبى، ءداندى داقىلدار فابريكاسى ەكەنىن اتاپ جازىپتى. قازاق مادەنيەتىنىڭ فورماسى ۇلتتىق، مازمۇنى سوتسياليستىك بولىپ دامۋ ۇستىندە دەگەن. قازاقستاندى مىسالعا الا وتىرىپ، قوعامنىڭ وندىرگىش كۇشى جانە وندىرىستىك قاتىناستار، جوسپارلى ەكونوميكا جانە اۋىل شارۋاشىلىعىنىڭ ىلگەرىلەۋىن تەوريالىق جاعىنان تاماشا تالقىلاپ بەرگەن. مۇنداي تەرەڭ ماعىنالى تەوريالىق ماقالالار رەسپۋبليكادا جوقتىڭ قاسى. ول قازاقستانداعى ساناۋلى رەۆوليۋتسيونەرلەردىڭ ءبىرى. سوندىقتان مەن وعان جازا قولدانعاندى ءجون كورمەيمىن».
بۇل كىم بولدى ەكەن؟ حاتتامادا نەگە ونىڭ اتى-ءجونى اشىپ جازىلماعان؟ كىم بولسا دا، ارىنا قاراپ، ءادىلىن ايتقان جان. وسى ءبىر جانعا قاراپ، باسشىلىقتا دا لەكەروۆتىڭ قادىرىن بىلەتىن جانە ونى باعالاي الاتىن جان دا بار ەكەن-اۋ. بىراق كوپ كوپتىگىن جاساپ، بار ايىپتى لەكەروۆتىڭ يىعىنا ارتىپ جاتقاندا «جالعىزدىڭ ءۇنى، جاياۋدىڭ شاڭى شىققان» با؟ 
ولكەلىك كوميتەتتىڭ تەكسەرۋ كوميسسيا­سىنىڭ توراعاسى: «جولداس لەكەروۆ ولكەلىك كوميتەتتىڭ كەيبىر شەشىمدەرىمەن كەلىسپەي تەكسەرۋ جاساعىسى كەلەتىن كوممۋنيست. رەسپۋبليكانىڭ استاناسى قىزىلوردادا بولعان كەزدە دە رەسپۋبليكا باسشىلارىمەن نۇرماقوۆتىڭ ۇيىندە كەزدەسىپ، ولكەلىك كوميتەتتىڭ بيۋرو مۇشەلەرىنە وزدەرىنە وڭتايلى كوممۋنيستەردى وتكىزبەك بولعانىن بىلەمىز. ءبىز لەكەروۆتىڭ ماسكەۋدە وقىپ جۇرگەن كەزىندە كىمدەرمەن كەزدەسىپ، رەسپۋبليكاداعى ماسەلەلەردى تالقىعا سالىپ، ءوز بەتتەرىنشە قالاي ىستەۋ كەرەكتىگىن كەڭەسىپ جۇرگەندەرىنەن حاباردارمىز. لەكەروۆ ولكەلىك كوميتەتتىڭ باعىتىنا دا وسى بيۋرو ماجىلىسىندە ءوز كوزقاراسىن اشىپ ايتىپ بەردى. مەنىڭ حاتتىڭ اۆتورى لەكەروۆ بولعانىنا ەش كۇمانىم جوق. باسقالارى كومەكتەرىن عانا تيگىزگەن. مەن كوممۋنيست لەكەروۆكە «قاتاڭ سوگىس ەسكەرتۋمەن» جاريا­لانسىن دەگەن ۇسىنىس ايتامىن».
لەكەروۆ ماسكەۋدە وقىپ جۇرگەندە نۇرماقوۆپەن، رىسقۇلوۆپەن كەزدەسىپ، قازاقستانداعى كوللەكتيۆتەندىرۋ جۇمىسىنىڭ دۇرىس جولمەن جۇرگىزىلمەي جاتقاندارى تۋرالى پىكىر الىسىپ جۇرگەنى راس. گولوششەكيننىڭ جاندايشابى سولاردى مەڭزەپ وتىر. 
ءازىمباي لەكەروۆ: «مەن ءوزىمنىڭ بۇ­رىنعى ­ايتقاندارىمدا تۇرامىن. ولكە­لىك كوميتەت رەسپۋبليكا اۋىلدارىندا اشتىقتان قىرىلىپ، مەكەن-جايلارىن تاستاپ كەتىپ جاتقان اش-ارىقتاردى، بوسقىنداردى توقتاتۋ ءۇشىن شۇعىل شارالاردى قولدانبادى. كولحوزداردى تەحنيكالارمەن قامتاماسىز ەتىپ، كولحوزشىلاردى جۇمىسپەن قامتاماسىز ەتە المادى. حاتقا قول قويعاندار مەنىڭ ايتقانىما كونىپ كەتتىك دەپ جاتىر. ولاي بولسا مەن قاتەمدى مويىندايمىن. ماعان كەرەگى رەسپۋبليكانىڭ ەكونوميكاسى ءوسىپ، اۋىل شارۋاشىلىعى وركەندەپ، حالىقتىڭ جاعدايى جاقسارعانى. باسقا ەشتەڭەنىڭ دە كەرەگى جوق». 
ۇلتىن شىن سۇيگەن ول ءوز سوزىندە تابانداپ تۇرا ءبىلدى. باسىنا ۇلتشىلدىق ايىبى تاعىلىپ جاتسا دا العان بەتىنەن قايتپاي ولكەلىك پارتيا كوميتەتىنىڭ جۇمىسىن وسىلاي سىنعا الدى. بەسەۋى بىردەي قۇرباندىققا شالىپ تۇرعان سوڭ، ءوزىنىڭ حاتتى ۇيىمداستىرۋشى ءارى جازعانىن دا ەر ازاماتشا موينىنا الدى. وسىلاي باسشىلىققا بۇرىن دا ۇلت ماسەلەسىندە كۇدىكتى كورىنەتىن ول وسى ۇلكەن جيىندا دا ءوزىنىڭ «ۇلتشىلدىعىن» انىق تانىتتى. (بىرىككەن بيۋرو ماجىلىسىندەگى سويلەۋشىلەردىڭ ۇزىندىلەرى ش.قالياكباروۆتىڭ «سەمەي تاڭى» گازەتىندەگى ماتەريالدارىنان الىندى. ا.ك.). 
بك(ب)پ ولكەلىك كوميتەتىنىڭ 
بيۋروسى مەن تەكسەرۋ كوميسسياسىنىڭ بىرلەسكەن ءماجىلىسىنىڭ 
№21 حاتتاماسى. 
15 شىلدە 1932 جىل. 
تىڭدالدى: مۇسىرەپوۆ، داۋلەتعاليەۆ، گاتاۋللين، التىنبەكوۆ، قۋانىشەۆ جانە لەكەروۆ جولداستاردىڭ مالىمدەمەلەرى تۋرالى.
قاۋلى ەتتى: اعىمداعى جىلى جات قۇبىلىستار، تاپ جاۋلارى بايلار مەن كۋلاكتار جانە ولاردىڭ يدەولوگيالىق جەتەكشىلەرى كەڭەس وكىمەتىنە قارسى ۇگىت پەن ءىس-ارەكەتتەرىن كۇشەيتۋدىڭ سالدارىنان، كورشى ايماقتارداعى قازاق شارۋاشىلىعى كۇرت تومەندەپ كەتكەن. بۇرىن پارتيانىڭ سارا جولىنان اۋىتقۋشىلىق ارەكەتتەرى بايقالماعان، پارتيانىڭ جەكەلەگەن مۇشەلەرى – مۇسىرەپوۆ، داۋلەتعاليەۆ، گاتاۋللين، التىنبەكوۆ جانە قۋانىشەۆ جولداستار داقپىرت سوزدەرگە ۇرىنىپ، كوڭىل-كۇيلەرىن بوساڭسىتىپ العاندىقتان سولاردىڭ ىقپالىنا بەرىلگەن. ولار وزدەرىنىڭ الاڭ كوڭىلدەرىن ورنىقتىرۋ قاراكەتىمەن وڭشىل-وپپورتۋنيستىك، ۇلتشىلدىق ەلەمەنتتەردىڭ (لەكەروۆ) ىقپالىنا ءتۇسىپ كەتكەن. بۇل ولاردىڭ 24 ماۋسىم كۇنگى ءوزارا بىرىككەن كەڭەستەرىندە سويلەگەن سوزدەرىنەن جانە ولاردىڭ 4 شىلدەدەگى ولكەلىك كوميتەتكە جازعان قۇجاتتارىنان كورىنىپ تۇر. قازاقستانداعى سوتسياليستىك قۇرىلىستىڭ وراسان زور تابىستارى مەن ۇلت ساياساتىنىڭ بارلىق جەتىستىكتەرىن تولىق جوققا شىعارىپ، ولكەلىك پارتيا كوميتەتى جۇرگىزىپ وتىرعان بارلىق باعىتتى سىناپ، تەك كەمشىلىكتەردى عانا اۋىزعا الىپ كورسەتەتىن سادۋاقاسوۆ پەن قوجانوۆتىڭ ۇستانىمدارىندا تۇرعاندارى انىق.
ولكەلىك پارتيا كوميتەتى بيۋرو مۇشە­لەرىنىڭ 4 شىلدەدە بولعان جينالىسىندا اتتارى اتالىنعان بۇل جولداستارعا ولار جازىلعان قۇجات بويىنشا اشىق جاعدايدا ءتۇسىندىرۋ جۇمىستارىنان سوڭ، بۇل جولداستار وزدەرىنىڭ قاتەلىكتەرىن تەرەڭنەن ءتۇسىنىپ، وزدەرىنىڭ تۇسىنىك-مالىمدەمەلەرىندە جىبەرگەن قاتەلىكتەرىن شىنداپ، اشىق تۇردە مويىنداعاندارىن ولكەلىك كوميتەت قاناعاتتانارلىق دەپ باعالايدى.
ولاردىڭ بۇل مالىمەتتەرىن قاناعاتتا­نارلىق دەپ تاني وتىرىپ، اتتارى اتالعان جولداستارعا ولكەلىك پارتيا كوميتەتىنىڭ باسشىلىعىمەن وزدەرى جات قۇبىلىستاردىڭ ىقپالدارىندا بولعان كوڭىل-كۇيلەرىمەن ىشتەي بەلسەنە ءارى ولارمەن ىمىراسىز كۇرەس جۇرگىزە وتىرىپ، قيىنشىلىقتاردان قورىقپاي، جەڭىپ شىعىپ، قازاقستانداعى سوتسياليستىك قۇرىلىستى ءىس جۇزىندە جۇزەگە اسىراتىن جۇمىستار جۇرگىزۋدى ۇسىنۋ قاجەت.
لەكەروۆ جولداستىڭ بۇرىنعى پارتياعا قارسى اۋىتقۋشىلىعىنان تۇزەلۋىنە ولكەلىك پارتيا كوميتەتى تاراپىنان ۇزاق ۋاقىت شىدامدىلىق تانىتىپ كەلدى. لەكەروۆ جولداس قىزىل پروفەسسۋرا ينستيتۋتىن ءبىتىرىپ كەلەسىمەن اسا جاۋاپتى قىزمەت مەملەكەتتىك جوسپارلاۋ كوميتەتى توراعاسىنىڭ ءبىرىنشى ورىنباسارلىعىنا تاعايىندالعانىنا قاراماستان العاشقى كۇننەن-اق ولكەلىك پارتيا كوميتەتى باسشىلىعىنىڭ جۇمىسىن جوققا شىعاراتىن جانە سادۋاقاسوۆشىلاردىڭ دۇرىستىعىن دالەلدەيتىن اعىمداعى جىلدىڭ بارلىق تەرىس فاكتىلەرىن جيناۋمەن بولدى.
…وتكەن 4 شىلدەدەگى مۇسىرەپوۆ، داۋلەتعاليەۆ، گاتاۋللين، التىنبەكوۆ جانە قۋانىشەۆ جولداستار تاپسىرعان قۇجاتتىڭ يدەولوگيالىق قۇرىلىمى لەكەروۆ جولداسقا تىكەلەي قاتىستى. لەكەروۆ جولداستىڭ ولكەلىك گازەتتەردە جاريالانعان ماقالالارى ولكەلىك كوميتەتتىڭ سوڭعى پلەنۋمىندا كاحيان جولداستىڭ تاراپىنان سىنعا ۇشىراۋى ونىڭ ماركسيزم-لەنينيزم اعىمىنىڭ كەزدەيسوق بۇرمالاۋشىلىعى بولىپ تابىلمايتىنىن، كەرىسىنشە لەنيندىك ىلىمگە قارسى، پارتياعا قارسى تويتارىس بەرگەن ۇستانىمىن كورسەتەدى. ونىڭ بۇدان باسقا دا ولكەلىك پارتيا كوميتەتى حاتشىلارىن سىناي وتىرىپ، سونىمەن بىرگە سادۋاقاسوۆ پەن قوجانوۆتى ماقتاۋى ولكەلىك كوميتەتتىڭ جانە پارتيانىڭ قازاقستاندا جۇرگىزىپ جاتقان جۇمىستارىنا قارسى توپشىلدىق كۇرەسۋدى جاڭارتۋ ەلەمەنتى بولىپ تابىلادى.
لەكەروۆ جولداسقا قاتاڭ سوگىس جاريا­لانسىن. ونىڭ قۇجاتتى تالقىلاۋ بارىسىندا بەرگەن مالىمدەمەسىنە قاراي لەكەروۆ جولداسقا الداعى ۋاقىتتا ءوزىنىڭ ادالدىعىن دالەلدەيتىن جۇمىسپەن كورسەتۋدى ۇسىنا وتىرىپ، ەگەر ول وسى ارەكەتىن قايتالايتىن بولسا، ولكەلىك كوميتەتتىڭ وسى قاۋلىسىندا كورسەتىلگەن نۇسقاۋى بويىنشا بۇدان دا قاتاڭ پارتيالىق جازا قولدانىلاتىنى ەسكەرتىلەدى.
گاتاۋللين جولداستىڭ وسىندا بولماي قالۋىنا بايلانىستى ونىڭ ماسەلەسى ءىس-ساپاردان ورالعانشا كەيىنگە شەگەرىلەدى. ال بارحيەۆتىڭ ارىزى بويىنشا گاتاۋللين تاراتقان وسەك-جالا ولكەلىك كوميتەت قاراۋىنا تاپسىرىلسىن.
بك(ب)پ ولكەلىك كوميتەتتىڭ حاتشىسى
گولوششەكين».
بيۋرو سوڭىندا كوپشىلىك داۋىسپەن لەكەروۆكە «قاتاڭ سوگىس»، ال حاتقا قول قويعاندار التىنبەكوۆ، گاتاۋللين، داۋلەتعاليەۆ، مۇسىرەپوۆكە ءجاي «سوگىس» جاريالاندى.

Back to top button