Елбасы Нұрсұлтан Назарбаев Түрік Республикасының Қорғаныс министрі Исмет Йылмазбен кездесті. Кездесу аясында әскери-техникалық саладағы екіжақты ынтымақтастық мәселелері талқыланды. Сонымен бірге, таяуда ашылған электронды-оптикалық құрылғылар шығаратын қазақ-түрік бірлескен кәсіпорны аясындағы серіктестік мәселелері де қозғалды.
Мемлекет басшысы кездесу аясында екі елдің қорғаныс өнеркәсібіндегі өзара ықпалдастығын одан әрі дамыту үшін бұл кәсіпорынның мән-маңызын атап өтті. Елбасы зауытты білікті жергілікті кадрлармен қамтамасыз етудің маңыздылығына да назар аударды. Өз кезегінде И.Йылмаз кәсіпорын құрылысы әскери-техникалық саладағы екіжақты қарқынды ынтымақтастықтың нәтижесі екенін айтты. Бұған қоса, ол бұл салада жақсы нәтижелер күтуге болатынын да тілге тиек етті
Түркия қорғаныс министрі аталмыш сапар аясында еліміздің қорғаныс саласы басшысы Әділбек Жақсыбековпен де кездесті. Екі ел қорғаныс ведомстволарының басшылары болашақ өндіріс корпустарының орналасу орнын қарап, аталған кәсіпорында шығарылатын өнімдердің үлгілерімен танысты. Қорғаныс министрі елордада ашылған жоғары технологиялық өндірісті қорғаныс өнеркәсібі кешенінің маңызын айрықша атап өтті. Бірлескен жоба бойынша еліміздің алғашқы кездегі үлесі 20 пайызды құрайды, алдағы 5 жыл ішінде оның үлесі 67 пайызға артатын болады.
«Қазақстан инжиниринг» ұлттық компаниясы» АҚ басқарма төрағасы Болат Смағұлов қорғаныс ведомстволарының басшыларын жаңа кәсіпорын өндіретін өнімдер тізімімен таныстырып өтті. Аталмыш кәсіпорын әртүрлі техникада қолданатын электронды платтардың (су асты кемелерінен бастап ғарыш кемелеріне дейін) кең спектрін шығармақ. Келешекте бұл зауыт дербес инфрақызыл линзалар шығару өндірісін ұйымдастыру, өндіріс үдерісі, жаңа технологияларды қолдану арқылы өнім өндіруді қамтиды. Бұл ТМД елдеріндегі сапалы өнім өндіретін бірінші кәсіпорын болып табылады.
Гүлзина БЕКТАС