كەمەلدىلىك كىلتى – كىتاپتا

«نۇر وتان» پارتياسىنىڭ رەسپۋبليكالىق قوعامدىق قابىلداۋ بولمەسىندە ەلباسىنىڭ «رۋحاني جاڭعىرۋ» باعدارلاماسى اياسىنداعى «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى بويىنشا قازاق تىلىنە اۋدارىلعان 18 كىتاپ تانىستىرىلدى.

ۇلتتىق اۋدارما بيۋروسىنىڭ وكىلدەرى الىبەك قيسىباي مەن ءاليحان تۇيەباەۆ 18 كىتاپتىڭ اتاۋىن، قاي تىلدەن اۋدارىلعانىن جانە جۇمىستاردىڭ قالاي ۇيىمداستىرىلعانى تۋرالى كەڭىنەن تانىستىردى.

باسقوسۋعا ۇلتتىق اۋدارما بيۋروسىنىڭ وكىلدەرىمەن قاتار، عالىمدار، پارتيا قىزمەتكەرلەرى جانە جاستار قاتىستى. ولار قازاق تىلىنە اۋدارىلعان كىتاپتار تۋرالى پىكىرلەرىن ورتاعا سالىپ، ۇسىنىستارىن ايتتى.

ۇلتتىق اۋدارما بيۋروسىنىڭ جوبا ۇيلەستىرۋشىسى الىبەك قيسىباي 100 كىتاپتى عانا اۋدارۋمەن توقتاپ قالمايتىندارىن، «گۋمانيتارلىق ءبىلىمنىڭ بارلىق باعىتتارى بويىنشا الەمدەگى ەڭ تاڭداۋلى 100 كىتاپتى ءارتۇرلى تىلدەردەن قازاق تىلىنە اۋدارۋ» جوباسىنان كەيىن دە بيۋرو كىتاپ اۋدارماسىن جالعاستىراتىنىن ايتتى.

قازىر اۋدارمالاردىڭ 90 پايىزىنا جۋىعى اعىلشىن تىلىنەن ءتارجىمالاندى. تاڭداۋلى ەڭبەكتەردى قازاق تىلىنە اۋدارۋ كەزىندە قيىندىقتار كەزدەسكەن.

− قازاق جانە اعىلشىن ءتىلىن بىردەي تۇسىنە الاتىن، سول سالادا مامان بولا الاتىن ادام تابۋ قيىن بولدى. مىسالى، پروفەسسور، كافەدرا باسقاراتىن ۇلكەن جاستاعى اعالارىمىز كوبىنە ءبىر ءتىلدى. ولار ءپاندى جاقسى تۇسىنەدى، بىراق قازاق جانە ورىس تىلدەرىندە. سول ءۇشىن اعىلشىن ءتىلىن بىلەتىن مامانداردىڭ نەمەسە شەتەلدە وقىپ كەلگەن جاستاردىڭ كومەگىنە جۇگىنەمىز. بىراق ولار عىلىميلىقتى پروفەسسور كىسىلەردەن ۇيرەنۋى كەرەك بولادى. ءسويتىپ، 2-3 ادام اتقاراتىن جۇمىسقا 6-7 ادام جۇمىلدىرىلادى، − دەيدى الىبەك قيسىباي. اتالعان كىتاپتاردىڭ ەلەكتروندى نۇسقاسى عالامتورعا الداعى 2-3 اپتا كولەمىندە شىعارىلماق. ونى وقىرماندار 100kitap.kz سايتىنان تەگىن وقي الادى.

ولار – «قۇدايتانۋ بايانى»، «ورتا عاسىر فيلوسوفياسى»، «مەنەدجمەنت»، «قازىرگى پسيحولوگيا تاريحى»، «فيلوسوفيانىڭ قىسقاشا تاريحى»، «ءتىل بىلىمىنە كىرىسپە»، «انتروپولوگيا تاريحى مەن تەورياسى»، «فيلوسوفيانىڭ تاڭداۋلى 25 كىتابى»، «انتيكا فيلوسوفياسى»، «ءتىل جانە مادەنيەتارالىق كوممۋنيكاتسيا»، «الەۋمەتتىك پسيحولوگيا»، «الەۋمەتتانۋ تەورياسى»، «الەۋمەتتانۋ نەگىزدەرى»، «ەكونوميكس»، «كوپكە ۇمتىلعان جالعىز»، «كاسىپكەرلىك»، «مەديا ەتيكا»، «ءتورتىنشى يندۋستريالىق رەۆوليۋتسيا».

− قازىر ەۋرازيالىق ۇلتتىق ۋنيۆەرسيتەتىمەن تىعىز بايلانىستامىز، سونداعى جانە باسقا دا ۋنيۆەرسيتەتتەردىڭ وقىتۋشىلارى قاجەتتى كىتاپتاردى اۋدارۋعا ۇسىنىس بىلدىرۋدە. كىتاپتى بەكىتكەننەن كەيىن دە، ونىڭ قانشالىقتى ماڭىزدىلىعى جۇمىس توبىنىڭ تالقىسىنا سالىنادى، – دەيدى الىبەك قيسىباي.

 

ۇقساس جاڭالىقتار

Back to top button