شىمكەنتتە جولاقىنى كوتەرۋگە موراتوري جاريالاندى

شىمكەنت قالاسىنداعى قوعامدىق كولىكتەگى بيلەت باعاسى تۋرالى ماسەلەگە موراتوري جاريالاندى. بۇل تۋرالى قالا اكىمدىگىندە وتكەن قوعامدىق كولىك تۋرالى جينالىستا ايتىلدى، دەپ حابارلايدى قالا اكىمدىگىنىڭ ءباسپاسوز قىزمەتى.

قازىرگى تاڭدا قالالىق اكىمدىك پەن جولاۋشى تاسىمالداۋشى كومپانيالار اراسىندا جاسالعان قوعامدىق كولىك باعىتتارىندا قىزمەت كورسەتۋ كەلىسىمشارتى جاڭارتىلۋدا. ءبىراز كومپانيالارمەن تۇزىلگەن كەلىسىم-شارت توقتاتىلدى. ناقتى ايتقاندا، №38، 101، 33، 12ا، 134 جانە 21 باعىتتار بويىنشا مامىر ايىندا كونكۋرس ۇيىمداستىرىلادى. ال 112-ورام، تەكەسۋ، التىنتوبە، اقجايىق جانە دوستىق-2 تۇرعىن الاپتارىنا قاتىنايتىن الەۋمەتتىك ماڭىزى بار 10 باعىت بويىنشا دا كونكۋرس مامىر ايىندا ۇيىمداستىرىلادى.  شىمكەنت قالاسىنىڭ اكىمى نۇرلان ساۋرانباەۆ جولاۋشى تاسىمالداۋشى كومپانيا جەتەكشىلەرىنەن قوعامدىق كولىكتەردىڭ تەحنيكالىق جاعدايى مەن سانيتارلىق تازالىعىنىڭ تالاپتارعا ساي بولۋىن تالاپ ەتتى. بۇعان قوسا جۇرگىزۋشىلەر مەن كوندۋكتورلاردىڭ بىرىڭعاي كيىنىپ، قىزمەتتىك مادەنيەتتى ساقتاۋىن، قوزعالىس كەستەلەرىنىڭ كەشكى ۋاقىتتاردا ورىندالۋىن قاتاڭ باقىلاۋعا الۋدى تاپسىردى.  جينالىستا، سونىمەن قاتار، جاۋاپتى ماماندارعا كولىك جۇرگىزۋشىلەرى جول ءجۇرۋ ەرەجەلەرىن بۇزعان جانە باسقا دا تالاپتاردى ورىنداماعان كولىك كومپانيالارىمەن اراداعى كەلىسىمشارتتى زاڭعا سايكەس بۇزۋعا، شاھارداعى كوشە قيىلىستارىندا ينتەللەكتۋالدى باعدارشام سانىن ارتتىرۋعا، سونداي-اق، زاڭسىز ۇيىمداستىرىلعان تاكسي تۇراقتارىن جويۋ تۋرالى تاپسىرما بەردى.

ۇقساس جاڭالىقتار

Back to top button