Jañalıqtar

JEL SÖZDİÑ GU-GU ETKENİ…

Bwqaralıq aqparat qwraldarı men äleumettik jelilerde London olimpiadasına Qazaqstan atınan qatısıp, çempion atanğan Zülfiya Çinşanlonıñ Qıtayğa ketip qalğandığı turalı aqparat qızu talqığa salınğan-dı. Bwl mälimetti Qıtaydıñ sports.sohu.com saytı qanday negizge süyenip taratqanı belgisiz küyde qalıp otır.

Aqparatqa süyensek, Zülfiya atalmış saytqa: «Otbasıma qaytudıñ quanışı erekşe eken. Öytkeni wstazdarım men jattıqtıruşılarımnıñ janına keldim. Eñ mañızdısı, men endi tuğan jerimniñ kökönisinen erkin jeytin boldım. Men eşqaşan «qıtaylıq emespin» dep aytıp körgen joqpın. Öytkeni men Qıtaydıñ Hunan audanınan şıqqan sportşımın. Elden jıraqqa ketip, Almatıda 5 jıl jürgenimde özimniñ qıtaylıq ekenimdi eşqaşan wmıtqan emespin. Ötken jılğı Guanjoudağı bäsekede, tipti osı jolı London olimpiadasında da tilşilerdiñ swhbatına men qıtaylıqpın, Qıtaydıñ Hunan audanınıñ adamımın dep jauap berdim», – dep jauap beripti-mis. Tipti, Qıtaydıñ aqparattıq saytı Zülfiya Çinşanlonıñ Qıtayğa qayta oralıp, 2016 jılğı Olimpiadağa Qıtaydıñ atınan şığuğa nietti ekendigin de badıraytıp jazıptı.

Zülfiya Çinşanlonıñ baspasözge ber­gen swhbatınan qıtay qazaqtarınıñ kultegin.com saytı mınanday üzindi keltiripti. «Men ejelden özimdi qıtaylıqpın dep sanap keldim. Zülfiya degen attı Almatıdağı käris jattıqtıruşısı qoydı. Men olardıñ Zülfiya dep atağanın mülde wnatqan emespin. Jüregimde bolğan bir arman – Qıtayğa barıp, özimniñ Çjao Çan'lin degen esimimdi qayta alu boldı. Qı­taydan ketip Almatığa barğan osı bes jıl işinde Qıtaydı mülde esimnen şığarğan emespin», – depti.

Alayda, Zülfiya Çinşanloğa baylanıstı şıqqan şuğa qatıstı Qazaqstan auır atletika federaciyasınıñ prezidenti Qayrat Twrlıhanov mırza: «Maya Maneza men Zülfiya Çinşanlo Qıtayğa tuısqandarına ketken edi. Maneza qazir elge qaytıp keldi. Zulyamen 1 sağat bwrın telefonmen söylestim. Aman-esen, jağdayı jaqsı. 26-sı küni tünde Pekinnen wşadı, 27-si bwyırtsa elimizde boladı. «Qazaqstanda ne äñgime bop jatır?» dep özimnen swrap jatır. Demek, qıtaylıq basılımdağı aqparat jalğan», – dep daurıqqan jwrttıñ aptığın basqan bolatın.

Bir qızığı, Qıtay auır atletika qauımdastığı Londonda ötken 2012 jılğı jazğı Olimpia­da oyındarınıñ çempionı qazaq­stan­dıq Zülfiya Çinşanlonı ota­nı­na qaytaru äreketine şındap­ kirisip ketipti. Russian.china.org.cn. basılımınıñ mälimetinşe, eger Qazaqstan öz erkimen Zülfiya Çinşanlonı jibermese, onda Qıtaydıñ sırtqı ister ministirligi arqılı qısımğa aludı közdep otır. Sebebi, Qazaqstannıñ auır atletika federaciyası men Zülfiya Çinşanlo arasındağı jasalınğan bes jıldıq kelisimşarttıñ merzimi bir ay bwrın ayaqtalğan. Osığan baylanıs­tı Qıtay auır atletika qauımdastığı Qazaqstanğa eki märte hat joldap, sportşını qaytarudı talap etken körinedi. Biraq, Qazaqstan jağı ol talaptı jauapsız qaldırıptı. Qıtay auır atletika boyınşa komanda bastığınıñ orınbasarı Hunan' Çjou Czyun'fu mälim etkendey, Qazaqstan Çinşanlonı jibermeytin bolsa, bwl mäsele diplomatiyalıq arnalar arqılı şeşilmekşi.

Bwğan deyin qıtaylıq BAQ-tarda 22 qazan küni Çanşa qalasınıñ YUyhua Qoğamdıq qauipsizdik basqarmasında auır atletşi Zülfiya QHR-dıñ jeke kuäligin räsimdep, Qıtay qwraması üşin qayta öner körsetudi oylastırıp otırğandığı aytıldı. Oğan negiz – Z.Çinşanlonıñ Qazaqstanmen jasağan besjıldıq kelisimşart merziminiñ ayaqtaluı. Degenmen, 27 qazan küni Qıtaydan Qazaqstanğa oralğan Olimpiada çempionı özi turalı qıtaylıq bwqaralıq aqparat qwraldarında jazılğan pikirlerdi joqqa şığarıp, Qıtay azamattığın almağanın, kelesi jarıstarğa qıtay qwramasında emes, Qazaqstannıñ atınan qatısatının ayttı. «Qıtayda men turalı jazılğandardıñ barlığı ötirik. Men mwnı Qazaqstanğa qaytıp keluimmen jäne osında twrğanımmen däleldedim. Mağan qoldau bildirgenderdiñ barlığına alğısımdı aytqım keledi. Qaytalap aytamın, bwnıñ bäri qauesetter jäne men bwl swraqqa qayta oraludı qalamaymın», – dedi.

Keybir aqparat közderine süyensek, London olimpidasınıñ çempionı Zülfiya Çinşanloğa Qazaqstan ükimeti uäde etken sıyaqısın äli bermepti. Onıñ Qıtay azamattığın alıp, tuğan jerine ketpekşi bolğan äreketi osı renişten tuındağan siyaqtı. Zülfiya Çinşanlo älem çempionı atanğan soñ Almatı oblısınıñ äkimşiligi oğan sıylıq retinde Taldıqorğan qalasınan eki bölmeli päter beretinin mälimdese, Qazaqstan ükimeti oğan Almatı qalasınan üş bölmeli päter jäne 250 mıñ dollar sıyaqı tağayındağan bolatın. Biraq mwnıñ bäri söz jüzinde qalğan körinedi. Tipti Zülfiyanıñ jeke bapkeri Viktor Ni de sporttağı jeñisi üşin uäde etilgen sıylıqtarğa şäkirtiniñ äli künge qolı jete qoymağanın aytıptı.

Ayta ketu kerek, Zülfiya 2006 jıldan beri Qazaqstan azamattığın alğan. Mine, sol kezden bastap onıñ sportta bağı janıp, jeñis twğırın bağındırıp keledi. Esesine, qazaq halqı da şınaşaqtay qızdıñ jetistigine quanıp, qoldap jürdi. Memleket tarapınan da ülken kömek körsetilude. Londonda ötken HHH jazğı Olimpiada oyındarında top jarıp, qazaq eliniñ abıroyın asqaq etken Zülfiya Çinşanlo barşa qazaqstandıqtardıñ qimas qızına aynaldı. Demek, bwl qazaqtı köre almauşılar men ayaqtan şaluşılardıñ äreketi! Esteriñizde bolsa, Zülfiya rekordtı jañartıp, Qazaqstan qorjınına altın salğan kezde Qıtaydıñ keybir arandatuşı toptarı onıñ Ioñ Djou Dao audanında tuılğanı turalı jäne onıñ şın atı Çjao Çan'lin ekenin aytqan bolatın. Şın mäninde, kezinde uısınan şığarıp alğan talanttı sportşıların endi san-saqqa jügirtui nağız iştarlıqtıñ körinisi emes pe?!

Dinara MIÑJASARQIZI

Back to top button