جاڭالىقتار

ۇكىمەت «حالىقتىق IPO»-نى قولعا الدى

اكتسيالار 6 قاراشادان باستاپ ساتىلادى

بۇعان دەيىن «حالىقتىق IPO» باعدارلاماسى بويىنشا اكتسيالاردى ورنالاستىرۋ جىل سوڭىنا دەيىن جۇزەگە اساتىندىعى تۋرالى ءمالىم ەتىلگەن بولاتىن. وسى اپتادا ۇكىمەت وتىرىسىندا باعدارلامانى باستاۋ تۋرالى شەشىم قابىلدانىپ، ءتيىستى قاۋلىمەن بەكىتىلدى. ەندى 6 قاراشادان باستاپ ءاربىر قازاقستاندىق اكتسيا ساتىپ الۋعا تاپسىرىس بەرە الادى.

قۇندى قاعازدارىن العاش بولىپ ساتى­لىمعا شىعاراتىن – «قازترانسويل» كومپا­نياسى. ءاربىر اكتسيانىڭ قۇنى – 725 تەڭگە بولماق. «سامۇرىق-قازىنا» ۇاق اق باسقارما توراعاسى ومىرزاق شوكەەۆ اكتسيالاردىڭ باعاسىن بەلگىلەۋدە بەدەلدى حالىقارالىق ساراپشىلاردىڭ ۇسىنىستارى ەسەپكە الىنعانىن ايتادى. ۇكىمەت مۇشەلەرى «بۇل – قازاقستان ازاماتتارى ءۇشىن قولجەتىمدى باعا» دەيدى. اكتسيالاردى ساتىپ الۋ ءۇشىن تۇرعىندار بروكەرلىك كومپانيالارمەن كەلىسىم-شارتقا وتىرۋى قاجەت. قۇجاتتى تىكەلەي بروكەرگە بارىپ نەمەسە «قازپوشتا» جانە «حالىق بانكتىڭ» بولىمشەلەرىندە راسىمدەۋگە بولادى. بۇگىندە مەملەكەتتىك باعدارلاما ارقىلى كومپانيالاردىڭ اكتسيالارىن ساتىپ العىسى كەلەتىن ازاماتتار ءۇشىن «قازپوشتانىڭ» كەز-كەلگەن بولىمشەسىندە ارنايى ماماندار اقىل-كەڭەس بەرىپ، قۇجاتتاردى راسىمدەۋگە دايار. ارنايى دايىندىقتان وتكەن 3 مىڭنان استام قىزمەتكەر كاسىبي بىلىكتىلىگىن جوعارىلاتىپ، ەلىمىزدەگى 7 مىڭ ەلدى مەكەننىڭ 3 مىڭىنداعى بولىمشەلەردە قىزمەت ەتۋدە. اكتسيالاردى ساتىپ الۋعا كەز-كەلگەن ازامات قۇقىلى. ياعني ەشقانداي شەكتەۋ جوق.

«سامۇرىق-قازىنا» ۇاق اق باسقارما توراعاسىنىڭ ورىنباسارى قۋاندىق ءبيشىم­با­ەۆتىڭ ايتۋىنشا، 6 قاراشادان باستاپ جازىلۋ باستالادى. «قازاقستاننىڭ بارلىق اۋماعىندا بروكەرلىك شوتىڭىز اشىق بولسا، «قازترانسويلدىڭ» اكتسيالارىن ساتىپ الۋ ءۇشىن تاپسىرىس بەرە الاسىز. ءبىر اي ۋاقىت بەرىلگەن. تاپسىرىس بەرۋ مەرزىمى 5 جەلتوقساندا اياقتالسا، 14 جەلتوقسانعا دەيىن تولىق ءتىزىم بەلگىلى بولادى. كەلەشەكتە قانداي كىرىستەر بولادى، قانداي شىعىستار بولادى. ينۆەستيتسيالىق جوبالار قانداي؟ سودان كەيىن تاريفتىك دەڭگەيى قانداي بولارىن بەلگىلەپ، اكتسيانىڭ باعاسى 310 ميللياردقا جۋىق بولىپ بەلگىلەندى. اكتسيالارعا 18 پايىز ديسكونت بەرىلىپ جاتىر. ويتكەنى «قازترانسويل» ول ءبىرىنشى رەت IPO-عا شىعاتىن كومپانيا. كەلەسى جىلى «كەگوك»، «قازترانسگاز»، «سامۇرىق-ەنەرگو» جانە «كازمورتترانسفلوت» كومپانيا­لارى شىعارىلادى»، – دەدى ول.

الدىن-الا جۇرگىزىلگەن زەرتتەۋلەر قورى­تىن­دىسىنا سەنسەك، حالىقتىڭ 34,4 پايىزى­ «حالىقتىق IPO» باعدارلاماسىنان حاباردار بولسا، ساۋالناماعا قاتىسقانداردىڭ 7,3 پايىزى، ياعني 500 مىڭ ادام اكتسيالاردى ساتىپ الۋعا قىزىعۋشىلىق بىلدىرگەن. بۇل ءالى دە بولسا حالىق اراسىندا ۇگىت-ناسيحات شارالارىنىڭ ايتارلىقتاي دەڭگەيدە جۇرگىزىلمەي جاتقاندىعىن كورسەتسە كەرەك. سوعان بايلانىستى پرەمەر-مينيستر سەرىك احمەتوۆ جاۋاپتى ورگاندارعا باعدارلامانى حالىق اراسىندا كەڭىنەن ناسيحاتتاپ، تۇرعىندارعا قور نارىعىنىڭ ەرەكشەلىكتەرىن ءتۇسىندىرۋدى جالعاستىرا بەرۋ كەرەكتىگىن قاداپ ايتتى. «ەلباسى تاپسىرماسىنا سايكەس، ۇكىمەتتە وتە ماڭىزدى شەشىم قابىلدانىپ، حالىقتىق IPO باعدارلاماسى ءوز جۇمىسىن باستادى. قازاقستان ازاماتتارى ەندى ءوز قارجىلارىن جىلجىمايتىن مۇلىك پەن بانكتەرگە عانا ەمەس، زاماناۋي قارجى ينستيتۋتتارىنا دا سالۋىنا مۇمكىندىك تۋىپ وتىر. باعدارلامانى ءتۇسىندىرۋ، ناسيحاتتاۋ شارالارىن بۇدان ءارى دە جۇرگىزۋ قاجەت. حالىققا اسىرەسە قور نارىعىنىڭ سىن-سيپاتىن جەتكىزۋ كەرەك. سودان كەيىن ءاربىر قازاقستاندىق ءوزى تاڭداۋ جاسايدى ەمەس پە؟ سوندىقتان باعدارلامانى ناقتى ىسكە اسىرۋعا ايماق باسشىلارى ىقتياتتىلىق تانىتۋى ءتيىس»، – دەدى پرەمەر.

ال «سامۇرىق-قازىنا» ۇاق اق باسقارما توراعاسى ومىرزاق شوكەەۆ: «ينۆەستورلاردىڭ ىشىندە باسىمدىق قازاقستان ازاماتتارىنا، ياعني بولشەك ينۆەستورلارعا بەرىلەدى. ولاردان كەيىن جيناقتاۋشى زەينەتاقى قورلارىنىڭ تاپسىرىستارى قاراستىرىلماق. «قازترانسويلدىڭ» اكتسيالارىن بولشەك ينۆەستورلارعا ساتۋ شەكتەۋلى مولشەردە بولادى. ياعني بولشەك ينۆەستورلاردىڭ وتىنىمدەرى شامامەن 7 ميلليون تەڭگە كولەمىنەن اسپاۋى ءتيىس. 2015-2022 جىلدارى قور بارلىق كومپانيالاردى قور نارىقتارىنا، سونىڭ ىشىندە حالىقارالىق نارىققا شىعارۋدى كوزدەيدى. باستى ماقسات – قوسىمشا كاپيتالدى تارتۋ جانە كومپانيالاردىڭ تيىمدىلىگىن كوتەرۋ»، – دەسە، پرەمەر-ءمينيستردىڭ ورىنباسارى قايرات كەلىمبەتوۆ: «ءبىزدىڭ ويىمىزشا، باعدارلاما مەملەكەتتىك كومپانيالارداعى كورپوراتيۆتى باسقارۋدى نىعايتادى. سونداي-اق ول حالىقتىڭ ەكونوميكالىق ساۋاتتىلىعىنا دا ىقپال ەتەدى دەگەن سەنىمدەمىز. باعدارلاما جەرگىلىكتى ينۆەستورلاردى تارتۋعا جانە كەلەشەكتە شەتەلدىك ينۆەستورلاردىڭ كاپيتالىن جۇمىلدىرۋعا مۇمكىندىك بەرەدى»، – دەپ تۇيىندەدى.

ۇكىمەت قۇندى قاعازدار نارىعىنا «قازترانسويل» اكتسيالارىن ورنالاستىرۋ تۋرالى قاۋلىنى بەكىتتى. 6 قاراشادا باستاۋ الاتىن قارجىلىق ناۋقان ارقىلى ەلىمىزدىڭ العاشقى حالىقتىق اكتسيونەرلەرى بەلگىلى بولماق. اكتسيونەر بولۋعا اسىعىڭىز، اعايىن!

دينارا مىڭجاسارقىزى

Back to top button