Jañalıqtar

52 ŞÖBERE SÜYGEN ÄZ ÄJE

Aumalı-tökpeli zamanda qazaqtıñ basınan ne ötpedi deseñşi. Qanşama jwrt şekara asıp, jat elden pana izdeuge mäjbür boldı. Söytken qandastarımız wrpaq örbitip, küni büginge deyin qazaqtıñ salt-dästürin keyingi buınğa jalğap keledi.

Bübihan äjey sonday buınnıñ wrpağı. Ol 1922 jılı Qıtayda tuılğan. Közin tırnap aşqannan Qıtaydıñ qatañ tärtibi men zañımen tärbielengen örimdey qız şiraqtıq pen şapşañdıqtı boyına siñiredi. Biraq ta Bübihan äje: «Qıtaydıñ sayasatına bağınsaq ta, qazaq ekendigimizdi bir sätke de esten şığarmay, wlttıq ädet-ğwrpımız ben salt-dästürimizdi jañğırttıq. Äke-şeşem bizdi solay tärbieledi. «Sen qazaqsıñ, seniñ tiliñ – qazaq tili» dep qwlağımızğa qwyıp otırdı. Bwl söz bizdiñ wlttıq namısımız ben qayratımızdı jani berdi, jani berdi, – dep ötkendi eske alğan äje: «Bir qauım el bolıp tütin tütettik. Eski käsibimiz – mal baqtıq. Bir-birimizge öte bauırmal boldıq. Söytip jürgende, 13 jasımda atastırılıp qoyğan ataña 16 jasımda twrmısqa şıqtım. Ömirge on perzent äkeldim. Keyingi balalarım öz Otanında ömirge keldi. Qwdaydıñ bergen jasınıñ arqasında bala-şağanıñ ortasında jüre bergenge ne jetsin?!» dep şükirşilik tanıttı.

Äñgime arasında hat tanımaytındığın aytqan äje: «Äke-şeşem ömir boyı maldıñ soñında jürdi. Biz de sol käsippen kettik. Eşkim de «oqı» dep aytpaptı ğoy», – dep sauat aşıp, bilim almağanına iştey ökinişi barın bildirip qaldı. Esesine bala-şağası joğarı bilim alıp, lauazımdı qızmetter atqarıp jürgenine täube deydi.

Naurız ayında 90 jasqa qadam basqan Bübihan Omarbekqızınıñ tabanı ataqonısı – Qazaqstanğa 1960 jıldarı tigen. Sol kezde Qıtaydan Qazaq dalasına ağılğan köş nöpiri erekşe sezildi. Ondağı ärbir qazaqtıñ jüregindegi asqaq arman – wrpağın öz elinde, öz Otanında ösiru, tärbieleu boldı. Tipti, qazaq dalasınıñ saf auasın tereñ jwtıp, tınıstaudıñ özin baqıt sanağandar az bolmadı sol kezde. Mine, sonday baqıttı kün Bübihan äjeniñ otbasına da bwyırıp, büginde on balasınan 43 nemere, 52 şöbere süyip otır.

«Bes qız wzatıp, bes kelin tüsirdim. Balalarım da ösip-önip jatır. Bireuiniñ üyinde bes kün, ekinşisiniñ üyinde on kün bop, qızığına toymay jüremin. Qazir Almatı oblısındağı Taşqarasu eldi mekenindegi nemeremniñ qolındamın. Allanıñ bergen künine qanağat qılıp kelemin», – degen äje «Qızdar men kelinderimiz qazaqtıñ sanınıñ ösuine bilek sıbana kirisse, äli-aq köbeyemiz» degen tilegin jetkizdi.

«Altın alqa» tağınğan Bübihan äje 90 jasqa şıqsa da, äli tıñ, sözi tüzu. Nemere, şöberelerine qwraq qwraudıñ qır-sırın üyretuden şarşağan emes. Al toy-tomalaqta auıldıñ altı auızın aytıp, suırıp salma aqındığımen közge tüsetin batır ana qaşan da auıl-aymaqqa sıylı, qwrmetti.

Dinara DÜRMÄN

Back to top button