Қырғызстаннан әкелінген балалар киімінен формальдегид табылды

Қырғызстаннан әкелінген балалар киімінен формальдегид табылды

Қырғызстаннан әкелінген балалар киімінен формальдегид табылды
ашық дереккөзі
Қарағандылық мамандар Қырғызстаннан әкелінген балалар киімінен улы зат тапты. Күртелер, жейделер мен белдемшелер, тіпті, жаңа туған нәрестелерге арналған ит көйлектерден де қауіпті газ – формальдегид анықталған. Бұл туралы Қарағанды облыстық қоғамдық денсаулық сақтау департаментінің өкілдері мәлімдеді, деп хабарлайды astanatv.kz
"Бұл киімдердің барлығы Қырғызстаннан әкелінген. Кәсіпкерлер оларды Алматы, Бішкек қалаларының базарларынан тасиды. Олардың құрамында формальдегидтің мөлшері өте жоғары. Бұл балаларымыздың денсаулығына үлкен қауіп төндіреді. Адамның денесіне біртіндеп сіңіп, ауыр дерттерге шалдықтырады", — дейді Қарағанды облыстық қоғамдық денсаулық сақтау департаменті басшысының орынбасары Юрий Залыгин. Санитарлардың айтуынша, улы зат тыныс алу жолдары мен жүйке жүйесін зақымдайды. Көз, тері ауруларына шалдықтырады. Сондықтан мамандар ата-аналарға иісі өткір киімдерді сатып алмауға кеңес береді. Өйткені қырғызстандық киім саудасына тосқауыл қою мүмкін болмай отыр. 2017 жылы тексерулер нәтижесінде 40-қа жуық кәсіпкерге ескерту жасалып, 2 миллион теңгеден астам айыппұл салынған. Алайда, жоспардан тыс тексеруге ілікпеген сауда нүктелері жетерлік. Мамандар саудагерлер киімдер туралы ақпараттарға, өндірілген орны мен мата құрамына мән бермейтінін айтады. Көпшілігінде сапа сертификаты да жоқ болып шыққан.