الماتىلىق تۇراقتارعا بىرىڭعاي ابونەمەنت ەنگىزىلدى

الماتىلىق جۇرگىزۋشىلەر بۇدان بىلاي ايىنا 12 مىڭ تولەپ، كولىگىن جابىق تۇراقتارعا دا، تروتۋار بويىنداعى تۇراقتارعا دا كەز-كەلگەن ۋاقىتتا قويا الادى. 

«ۇزاق تالداۋدان سوڭ قالا بويىنشا بىرىڭعاي ابونەمەنت جاساۋ تۋرالى شەشىم قابىلداندى. ەندى جۇرگىزۋشىلەر كەز كەلگەن جەرگە 12 مىڭ تەڭگەگە كولىگىن قويا الادى. ال جەڭىلدىك الاتىن ساناتتاردى بىزگە الماتى اكىمدىگى بەلگىلەپ بەردى. ارنايى تىركەۋدەن سوڭ جۇرگىزۋشىلەر اقى تولەۋدەن بوساتىلادى»، – دەدى «الماتى سپەتستەحپاركينگسەرۆيس» جشس ديرەكتورى مارات پىرىنبەكوۆ.

م.پىرىنبەكوۆ قالا تۇرعىندارى تاراپىنان كوپتەگەن نارازىلىق تۋىپ وتىرعانىن دا ايتتى. «اقىلى تۇراعى بار اۋدانداردا تۇرعىندار كولىك قويا الماي قالدى. ولاردىڭ كوپشىلىگىمەن ءتۇسىندىرۋ جۇمىستارى جۇرگىزىلدى. ەندى تۇرعىندار ايىنا 1 مىڭ تەڭگە تولەپ، رەزيدەنتتىك كەلىسىمگە وتىرادى. سوندا 6 ايدا تۇرعىندار 6 مىڭ تەڭگە تولەپ، كولىكتەرىن تۇراققا قويا الادى»، – دەدى ول.

ول ءۇشىن تۇرعىندار «الماتى سپەتستەحپاركينگسەرۆيس» جشس كەڭسەسىنە كەلىپ، رەزيدەنتتىك كەلىسىمگە قول قويۋى كەرەك. ونىڭ ايتۋىنشا، بيىل ءبىر ايعا تولەگەندە كوشە بويىنداعى تۇراق ورنىنىڭ باعاسى 18 مىڭنان 12 مىڭعا تومەندەگەن.

بۇعان قوسا، بيىلدان باستاپ پاركوماتتار ارتىق اقشانى قايتاراتىن بولادى. «پاركوماتتاردىڭ ارتىق تولەمدى قايتارمايتىنى پروبلەما. بۇل تۋرالى نارازىلىقتار وتە كوپ. بىراق پاركومات بانكومات ەمەس. ايتپەسە، ۆانداليزم بار، وڭاي ولجاعا كەنەلگىسى كەلەتىندەر دە از ەمەس. بۇرىن پاركوماتتار تەك تيىن قابىلدايتىن. ەندى اپپاراتتار قاعاز اقشا دا الاتىن بولدى. جاقىندا پاركوماتتار تولەنگەن ارتىق اقشانى ءموبيلدى تەلەفونعا قايتاراتىن بولادى. ول ءۇشىن جۇرگىزۋشىلەر ءموبيلدى قوسىمشانى جۇكتەۋى ءتيىس»، – دەدى مارات پىرىنبەكوۆ.

 

ۇقساس جاڭالىقتار

Back to top button