مەملەكەت باسشىسى اقتوبەدەگى ءوندىرىس ورىندارىن ارالادى

اقتوبە وبلىسىنا جۇمىس ساپارىمەن كەلگەن ەلباسى نۇرسۇلتان نازارباەۆ اقتوبە فەرروقورىتپا زاۋىتىندا، رەلس-ارقالىق زاۋىتى مەن جىلىجايدا بولدى، دەپ حابارلايدى قازاقپارات ءتىلشىسى.  

اقتوبەگە جۇمىس ساپارىمەن كەلگەن مەملەكەت باسشىسى نۇرسۇلتان نازارباەۆ الدىمەن اقتوبە فەرروقورىتپا زاۋىتىندا بولدى. زاۋىتتىڭ №4 تسەحى 2014 جىلى ىسكە قوسىلعان ەدى.  اقتوبە اقپارات ورتالىعىنىڭ حابارلاۋىنشا، قۇنى 126،4 ملرد. تەڭگە بولاتىن جوبا جوعارى كومىرتەكتى فەرروحروم ءوندىرۋدى ارتتىرۋ مۇمكىندىك بەردى. №4 بالقىتۋ تسەحى جىلىنا 440 مىڭ توننا ءونىم شىعارا الادى.  ءونىمنىڭ نەگىزگى تۇتىنۋشىلارى – قحر، ەۋروپا، اقش. كەيىن ەلباسى رەلس-ارقالىق زاۋىتىندا بولدى. بۇعان دەيىن حابارلاعانىمىزداي، ەلباسى جۇمىسشىلارمەن تىلدەسىپ، اقتوبەنىڭ مۇمكىندىگى زور ەكەنىن جەتكىزدى. كاسىپورىن ەەك اۋماعىنداعى ۇزىندىعى 120 مەتر بولاتىن رەلس شىعارادى. جوسپار بويىنشا زاۋىت كەلەر جىلى تولىق قۋاتتىلىعىنا كوشىپ، جىلىنا 430 مىڭ توننا پروكات، سونىڭ ىشىندە جوعارى جىلدامدىقتاعى ماگيسترالدار ءۇشىن 200 مىڭ توننا رەلس، قۇرىلىس سەكتورى ءۇشىن 230 مىڭ توننا ءونىم شىعارادى. كاسىپورىن وسى جىلدىڭ توعىز ايى ىشىندە قۇنى 31،2 ملرد. تەڭگە بولاتىن  116،4 مىڭ توننا رەلس ءونىمىن وندىرگەن. ءونىمنىڭ نەگىزگى تۇتىنۋشىلارى – «قازاقستان تەمىر جولى» اق، وزبەكستان، تۇرىكمەنستان، ازەربايجان. ەلباسى ن.نازارباەۆقا شىعارىلاتىن ءونىمنىڭ ۇلگىلەرى كورسەتىلىپ، ءوندىرىستىڭ تەحنولوگيالىق ۇدەرىسى تانىستىرىلدى. ايتا كەتەيىك، اقتوبە وبلىسىندا يندۋستريالاندىرۋ كارتاسىنىڭ ەكىنشى بەس جىلدىعىنىڭ اياسىندا 6 500 جۇمىس ورنىن قامتاماسىز ەتەتىن قۇنى 258 ملرد تەڭگە بولاتىن 23 جوبانى جۇزەگە اسىرۋ جوسپارلانىپ وتىر. بۇگىندە جالپى قۇنى 13 ملرد تەڭگە بولاتىن 11 جوبا پايدالانۋعا بەرىلگەن. اقتوبە  وبلىسىنىڭ 30 ءىرى كومپانياسىمەن جاڭعىرتۋ جانە مامانداردى قايتا وقىتۋ ءىس-شارالارىنىڭ جوسپارىنا قول قويىلدى. قازىرگى تاڭدا ون كاسىپورىن جاڭعىرتىلعان. ەلباسى كەيىن «Greenhouse Kazakhstan» جىلىجاي كەشەنى قاراپ شىقتى. «قازاگروقارجى» اق قولداۋىمەن پايدالانۋعا بەرىلگەن جىلىجايدىڭ قۇنى 5،7 ملرد تەڭگەنى قۇرايدى. كەشەننىڭ اۋماعى – 9،5 گەكتار.

ۇقساس جاڭالىقتار

Back to top button