قازاقستان مەن قىرعىزستان ءدىني سالادا ىنتىماقتاسا جۇمىس ىستەيدى

قازاقستان مەن قىرعىزستان ءدىني سالادا ىنتىماقتاسا جۇمىس ىستەۋگە ۋاعدالاستى. قازاقستان رەسپۋبليكاسىنىڭ ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ قىرعىزستانعا جۇمىس ساپارى بارىسىندا قىرعىزستان رەسپۋبليكاسىنىڭ ءدىن ىستەرى جونىندەگى مەملەكەتتىك كوميسسياسىنىڭ ديرەكتورى زايىربەك ەرگەشوۆپەن كەزدەستى.

ەكى ەلدىڭ ۆەدومستۆو باسشىلارى ارىپتەستىك جونىندەگى مەموراندۋمعا قول قويدى. اتالعان مەموراندۋم تاجىريبە مەن اقپارات الماسۋدى، سونداي-اق ەكى مەملەكەتتىڭ ءدىن سالاسىنداعى مەملەكەتتىك ساياسات تۇجىرىمدامالارىندا كوزدەلگەن  ىس-شارالار جوسپارلارىنىڭ ورىندالۋىن باقىلاۋ جانە جۇزەگە اسىرۋدى كوزدەيدى.    «قۇجاتتا، ءبىز ەكى مەملەكەتتىڭ مۇددەسى ءۇشىن ءدىن سالاسىنداعى مەملەكەتتىك ساياساتتى ءتيىمدى ىسكە اسىرۋ ءۇشىن ىنتىماقتاستىقتىڭ بارلىق اسپەكتىلەرىن كەڭىنەن قامتۋعا كۇش سالدىق»،- دەپ اتاپ ءوتتى مينيستر نۇرلان ەرمەكباەۆ. مەموراندۋمنىڭ ماڭىزدى تارماقتارىنىڭ ءبىرى – ءدىني سالانى رەتتەۋدەگى ۋاكىلەتتى مەملەكەتتىك ورگانداردىڭ ىنتىماقتاستىعى، حالىقتى تەرىس ءدىني يدەيالاردان قورعاۋ، شەتەلدىك ءدىني ەكسترەميستىك ۇيىمداردىڭ ىقپالىنا ۇشىراعان ادامدارعا دۇرىس باعىتتا كەڭەس بەرۋ جانە  دەراديكالداندىرۋ جونىندەگى جۇمىس شەڭبەرىندە ءوزارا ءىس-قيمىل جاساۋ جانە تاجىريبە الماسۋ. سونىمەن بىرگە، مەموراندۋم مەملەكەتتەر اراسىنداعى تەولوگيالىق (رۋحاني) جانە ءدىني زەرتتەۋلەردى دامىتۋ سالاسىنداعى ىنتىماقتاستىقتى نىعايتۋعا باعىتتالعان. مەموراندۋم اياسىندا حالىقتى ءدىني تاربيەلەۋگە جانە كونفەسسياارالىق كەلىسىمدى نىعايتۋعا باعىتتالعان بىرلەسكەن عىلىمي تۇرعىدا ءبىلىم بەرۋ باعىتىنداعى ءىس-شارالاردى وتكىزۋ جوسپارلانىپ وتىر. سونداي-اق بەكىتىلگەن مەموراندۋم، ءدىني سالاعا قاتىستى عىلىمي، كوركەم، ساراپتامالىق ادەبيەتتەردى جانە باسقا دا اقپاراتتىق ماتەريالداردى جاساۋ، تاراتۋ جانە جاريالاۋ مۇمكىندىگىن نىعايتۋعا سەرپىن بولماق.  ايتا كەتەيىك، بۇگىن قازاقستان رەسپۋبليكاسى ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ بىشكەك قالاسىندا وتكەن «قازىرگى زاماناۋي زايىرلى مەملەكەتتەگى يسلام» تاقىرىبىندا ۇيىمداستىرىلعان حالىقارالىق كونفەرەنتسياعا قاتىستى.

Back to top button