قايتىس بولعان 10 ادامنىڭ زەينەتاقىسىن تۋىستارى الىپ وتىرعان

پاۆلوداردا مارقۇم بولعان 10 ادامنىڭ تۋىسى ولاردىڭ اتىنان زەينەتاقى الىپ كەلگەن، – دەپ حابارلايدى استانا ارناسى.  

پاۆلوداردا ومىردەن وتكەن 63 ادامنىڭ ءولىمى تۋرالى قۇجات ازاماتتىق حال اكتىلەرىن جازۋ قىزمەتىندە تىركەلمەگەن. سالدارىنان مارقۇم بولعان 10 ادامنىڭ تۋىستارى بىرنەشە جىل  ولاردىڭ اتىنان زەينەتاقى مەن جاردەماقى الىپ كەلگەن.

الدىن الا ەسەپ بويىنشا،  بيۋدجەتكە كەلتىرىلگەن شىعىن كولەمى 5 ملن تەڭگەدەن اسادى. مۇنداي سوراقى مالىمەتتى وبلىستىق پروكۋراتۋرا حابارلادى. قاداعالاۋ ورگانىنىڭ اقپارىنشا، قايتىس بولعان ادامدى كومۋ ءىسى احات بولىمىندە تىركەۋسىز جۇزەگە اسىرىلادى. ياعني ازاماتتار قازا تاپقان تۋىسى جايلى ءتيىستى ورگانعا حابارلاۋعا مىندەتتى ەمەس.

تاجىريبە كورسەتكەندەي، بۇل جاعداي كەيبىر پىسىقايلاردى وڭاي ولجا تابۋعا يتەرمەلەدى. ماسەلەن، اقسۋ تۇرعىنى 1949 جىلى تۋعان اپكەسىنىڭ ولىمىنەن كەيىن ەكى جىل بويى ونىڭ شوتىنان اقشا الىپ وتىرعان. جالپى شەشىلگەن سوما 1 ملن 67 مىڭ تەڭگەنى قۇرادى. بۇگىندە ءىس قۇقىق قورعاۋ ورگاندارىنا جىبەرىلىپ، تەرگەۋ امالدارى باستالعان.

ال ەكى دەرەك بويىنشا قىلمىستىق كودەكستىڭ «الاياقتىق» بابىمەن ءىس قوزعالدى. بۇل باپ 2 جىلعا دەيىن باس بوستاندىعىنان ايىرۋ جانە 1000 ايلىق ەسەپتىك كورسەتكىش كولەمىندە ايىپپۇل تاعايىنداۋ جازاسىن قاراستىرادى. «قايتىس بولعان ادامنىڭ بانك كارتاسىن تەك وعان قۇقىلى تۇلعا عانا پايدالانا الادى. سوندىقتان ولار، ەڭ بولماعاندا، شوتتان اقشا شەشۋدى توقتاتۋ كەرەك ەدى. تۋىسىنىڭ جوعىن بىلە تۇرا، بۇل ازاماتتار تولەم كارتاسىن جويۋدىڭ ورنىنا، ونى قولدانۋدى جالعاستىرعان. ياعني زاڭعا قايشى ارەكەت ەتكەن»، – پاۆلودار وبلىستىق پروكۋراتۋراسىنىڭ وكىلى باقىتجان دوسانوۆ.

ۇقساس جاڭالىقتار

Back to top button