وسكەمەندە اۋقىمدى ويىن بيزنەسىنىڭ جەلىسى اشكەرەلەندى

شىعىس قازاقستان وبلىسىنىڭ مەملەكەتتىك كىرىستەر دەپارتامەنتىنىڭ ەكونوميكالىق تەرگەۋ قىزمەتى ويىن بيزنەسىنە قاتىستى ءبىر عانا ءىس بويىنشا 61 تەرمينالىن انىقتادى.

ويىن قۇرىلعىلارىنىڭ بارلىعى جويىلدى، دەپ حابارلايدى «قازاقپارات» حاا ءتىلشىسى. اتاپ ايتقاندا، وسكەمەن قالاسىنىڭ 30-عا جۋىق ساۋدا نۇكتەلەرىنەن 61 لوتوتەرمينال تاركىلەنگەن. ولاردىڭ ىشىندە جالپى سوماسى 7،4 ملن تەڭگەنىڭ بولعانى انىقتالىپ وتىر. «قىلمىستىق ءىس كەلەسى سىزبا بويىنشا ىسكە اسىرىلعان: قاراعاندى قالاسىنىڭ تۇرعىنى تەرمينالدارمەن جۇمىس اتقاراتىن كادرلاردى جالداپ، ولارعا اي سايىن اقشالارىن تولەپ وتىرعان. ول جالداعان «ماماندار» تەرمينال قويىلاتىن ورىندار ءۇشىن ساۋدا نۇكتەلەرىنىڭ يەلەرىمەن كەلىسىپ، قۇرىلعىنىڭ اقشالاي ينكاسساتسياسىن جۇزەگە اسىرعان. ويىن بيزنەسىنەن تۇسكەن سوما بانك كارتاسىنىڭ شوتىنا اۋدارىلىپ وتىرعان»، – دەيدى شقو مكد ەتق اعا تەرگەۋشىسى لەيلا ىسقاقوۆا. قىلمىستىق توپ 2016 جىلدىڭ قاراشاسى مەن 2017 جىلدىڭ ناۋرىزى ارالىعىندا لوتورەيالىق ۇتىس ويىنى رەتىندە قۇرىلعىلاردى وسكەمەن قالاسىنداعى مەيرامحانالار مەن ساۋدا ورتالىقتارىنا، دۇكەندەرىنە قويىپ، وسى ارالىقتا 21 ملن تەڭگە پايدا تاپقان. وسكەمەن قالاسىنىڭ سوتىنىڭ ۇكىمىمەن قىلمىستىق توپ مۇشەلەرى 3،5 جىل مەرزىمگە شارتتى تۇردە سوتتالدى. بۇعان قوسا ويىن بيزنەسى بويىنشا وسكەمەن مەن سەمەي قالالارىندا تاعى ەكى جاعداي تىركەلىپ، وعان سوت ۇكىمى دە شىعىپ قويعان. قوس قالاداعى سوتتالۋشىلاردىڭ ءبىر جىلعا شارتتى تۇردە باس بوستاندىقتارى شەكتەلگەن. سونىمەن قاتار، ولارعا ءىرى كولەمدە ايىپپۇل سالىنعان. لەيلا ىسقاقوۆانىڭ ايتۋىنشا، ساۋدا نەمەسە دۇكەن نۇكتەلەرىن جالعا بەرۋشىلەر دە نازاردان تىس قالماعان. مۇنداي قىلمىسقا جول بەرگەن ادامدار قر قىلمىستىق كودەكسىنىڭ 307-بابى بويىنشا جاۋاپقا تارتىلادى. كىنالارى دالەلدەنسە ولارعا 2000 اەك-كە دەيىن ايىپپۇل سالىنۋى مۇمكىن.

ۇقساس جاڭالىقتار

Back to top button