سەرىك احمەتوۆتىڭ بوستاندىققا قاشان شىعاتىنى بەلگىلى بولدى

قازاقستاننىڭ ەكس-پرەمەر-ءمينيسترى سەرىك احمەتوۆ 21 قىركۇيەكتە بوستاندىققا شىعارىلادى، دەپ حابارلايدى 31 ارنا

5 قىركۇيەكتە سەرىك احمەتوۆ جازاسىن وتەپ جاتقان اك 159/18 كولونياسىندا جابىق سوت وتىرىسى ءوتتى. ارنا ءتىلشىسىنىڭ حابارلاۋىنشا، سوت ءالى دە رەسمي مالىمدەمە جاساعان جوق. الايدا بۇعان دەيىن سەرىك احمەتوۆ جازانىڭ وتەلمەگەن بولىگىن باس بوستاندىعىن شەكتەۋ جازاسىنا اۋىستىرۋدى سۇراعان بولاتىن.

ەسكە سالساق، بۇرىنعى ۇكىمەت باسشىسىنا تاپسىرىلعان وزگەنىڭ مۇلكىن يەمدەنۋ، كاسىپكەرلىك قىزمەتكە زاڭسىز ارالاسۋ، قىزمەتىن اسىر پايدالاندى دەگەن ايىپ تاعىلىپ، ول 10 جىلعا باس بوستاندىعىنان ايىرىلعان.

كەيىننەن اپەللياتسيالىق ينسستانتسيا ونىڭ جازاسىن سەگىز جىلعا دەيىن قىسقارتىپ، از ۋاقىتتان سوڭ تاعى ءبىر جىل جەتى ايعا ازايتقان. ال كەشە سوت سەرىك احمەتوۆتىڭ ارىزىن قاناعاتتاندىرىپ، قالعان ءتورت جىل 26 كۇندىك جازاسىن باس بوستاندىعىنان شەكتەۋ تۋرالى باپقا اۋىستىردى.

سونىمەن بىرگە، ەكس-پرەمەر مەملەكەتكە كەلتىرىلگەن شىعىندى تولىعىمەن وتەپ بەرگەنى تۋرالى اقپارات تاراعان.

ۇقساس جاڭالىقتار

Back to top button