Бердібек Сапарбаев: Бұл мал қора емес!

Қарғалы ауданына жұмыс сапарымен барған Ақтөбе облысының әкімі Бердібек Сапарбаев  Шәмші ауылында салынып жатқан ауыл клубының құрылысымен танысты. Әкім мәдениет ошағының сыртқы келбетін де, сәулетшілер бекіткен дизайнды да ұнатпаған. Бұл туралы tilshi.kz хабарлады. «Бұл клуб қой. Сарай немесе мал қора емес. Неге фантазияларыңа ерік бермейсіңдер? Кішкене ойланып, қиялға ерік беріп, қосымша элементтер неге пайдаланбасқа?», — деп ренжіді облыс басшысы. Құрылыс жұмыстарының аяқталуына әлі екі айдан астам уақыт бар. Сондықтан, облыс әкімі бой көтеріп жатқан нысанның сыртқы келбетін әлі де дұрыстауға мүмкіндік барын меңзеді. Айта кетейік, 150 орынға есептелген ауыл клубының құрылысына бюджеттен 48 млн теңге бөлінген. Мұнда кітапхана, түрлі үйірмелер, концерт залы қарастырылған. Облыс басшысы Қарғалы су қоймасы жағалауында салынады деп жоспарланған демалыс орнының макетімен де танысып, көңілі толмайтынын білдірді. Айналасындағыларды Орынбор облысындағы балалар лагерінің эскизімен таныстырып шыққан Бердібек Сапарбаев Қарғалы су қоймасы маңындағы демалыс орнының құрылысын әзір бастаудың қажеті жоқ екенін айтты.